Téléchargement du document

Documents linguistiques galloromans
Corpus : (chPoit)
Responsable du corpus : -
Édition de la charte : -

chPoit234

1298, 25 janvier.

Type de document: Charte: transaction

Objet: Transaction par laquelle Nicholas et Guillaume de Forras, frères, abandonnent plusieurs pièces de terre pour régler leur dette de cent quinze livres d'arrérages de cens envers maître Pierre de Condac, clerc de La Rochelle.

Support: Charte partie par ABC; autrefois scellée.

Lieu de conservation: Archives Départementales de la Charente-Maritime, Registre H. 15, N° 26. - Hospices de La Rochelle: Aumônerie et Hôtel-Dieu Saint-Barthélemy.

1 Ge Nicholas de Forras e ge Guillaume de Forras, freres, filz dou Johan de Forras, bourgeis de la Rochele, e filz de fahue Bienvenue qui jadis fut femme espouse de nostre dit pere, 2 faisom à ssaveir à touz ceaus qui ceste presente chartre veiront e oiront 3 que, cum çay-en-arreres \2 nous, par comun assentement e chascun de nous por le tout, 4 ob l'assentement e ob l'auctorité dau dit Johan de Forras nostre pere, 5 eüssom vendu e otreié à maistre Pere de Condac, clerc demorant en la Rochele, 6 trente livres de annau e perpetuau cens de la moneie censau par la vile de la Rochele; 7 e ice\3les trente livres de annau e perpetuau cens, nous e chascun de nous por sei e por le tout, 8 ob l'assentement e ob l'auctorité de nostre dit pere, 9 eüssom assis e assigné au dit maistre Pere de Condac à prendre e à aveir e à demander e à receveir à lui e à ses heirs e à ses successors ou à lour comandement \4 e à qui d'eaus avreient cause chascun an, 10 touz jours mais perpetuaument par les quatre quarterons de l'an sus nostre troil e sus nostre arbergement que nous aviom par nom devis à Puy Liboreau de l'eschaeite e de la succession de part nostre dite mere, 11 e sus le fonz de la terre sus quei il sieent, e sus le verger \5 qui est par detreis, 12 e sus toutes les apartenances qui au dit troil e au dit arbergement apartienent, 13 e sus toutes les vignes enterinement, blanches e vermeilles que nous aviom ou Fié de Rocheffort e aillors apartenanz au dit troil e au dit arbergement, 14 e sus toutes les noz autres chouses enterine\6ment, celes que nous aviom e que nous avriom, 15 quauque part e en quauque luec qu'eles sereient e fussent, moubles e non moubles, 16 e sus chascune chouse nommeement e expressement por sei e por le tout e chascun de nous e les soes chouses por sei e principaument pour le tout; 17 e nommeement e speciaument nos \7 li en eüssom doné e obligé en enforcement nostre troil e nostre arbergement que nous avom à Marcillé e le fonz de la terre sus quei il sieent, ob toutes lour apartenances, 18 e toutes les vignes enterinement blanches e vermeilles qui au dit troil e au dit arbergement apartienent e que apartenir y po\8ent e devent e que nous e chascun de nous por sei avom e que aver poom e devom ou Grant Fié d'Aunis, 19 si comme il est contenu e devisé en un instrument que entre nous e le dit Johan de Forras, nostre pere, en donasmes au dit maistre Pere de Condac, 20 qui est saelé dau saeau de la seneschau\9cie de Xainctonge, gardé en la Rochele pour nostre seignor le rei de France; 21 e lonc temps enprés ceu que nous li eüsmes fait la dite vente e la dite assise e assignacion des trente livres de annau e perpetuau cens dessus dites, 22 le dit maistre Pierres de Condac nous eüst fait apeler à dreit \10 par davant Guillaume Lescuier, vallet nostre seignor le rei de France e portant les feiees au seneschau de Xainctonge, 23 e nous demandast en dreit par davant le dit Guillaume Lescuier que nous li feïssom sattisfacion e plener e enterin payement de cent e quinze livres de torneis que nos \11 li deviom 24 e en quei nous e les noz chouses e chascun de nous por sei e pour le tout li estiom tenuz e obligez par la vertu de la vençon dessus dite; 25 les queles cent e quinze livres dessus dites nous deviom au dit maistre Pere des arrerages daus trente livres dessus dites de cens dau temps qui passez es\12teit; 26 e d'autre part nous requeïst le dit maistre Pierres de Condac que nous, les chouses e les heritages dessus diz qui tenuz e obligez li esteient à li rendre e payer e censer les trente livres de cens dessus dites tenissom e conobressom de façons deües 27 einssi que les diz heritages e choses \13 ne se peüssent deperir pour faute de laborage, e que le dit cens ne se peüst deperdre; 28 e que nous des lors en avant le censessom de son dit cens, si comme nous li en estiom tenuz; 29 e nous les dous freres dessus nommez presenz, establiz personaument en dreit par davant le dit Guillaume Lescuier 30 responsis\14som e deïssom au dit maistre Pierres de Condac que nous ses davant diz arrerages ne li poyom rendre ne poyer ne li en faire son gré, 31 pour ceu que nous n'aviom mie biens moubles à present dont nous li peüssom faire sattisfacion e payement de la quantité de pecune dessus dite, 32 ne \15 de quei nous poüssom les diz heritages e chouses governer e conobrer, si comme mesters nous fust; 33 les quaus heritages e chouses esteient moust decheüz e en moust mauvais point por deffaute de laborage; 34 e lonc temps à que il fussent deperiz e cheüz en main de seignor, se ne fust l'ayde \16 e le laborage que le dit maistre Pierres y fait e fait faire por lonc temps en quei il a mis e despenduz granz deners, si comme nous savom e somes bien certain; 35 ne ne li peüssom plus en avant censer les davant dites trente livres de cens, quar trop nous fust grevouse chouse e damajese \17 à les li censer; 36 e pour ceu, nous les dous freres dessus nommez requeïssom au dit Guillaume Lescuier que il li pleüst, 37 e que la volunté dau dit maistre Pierres fust que il nous donast dous prodes homes dignes de fei, qui seüssent conoistre de teles chouses, qui alassent ob \18 nous e ob le dit maistre Pierres sus les heritages e sus les chouses dessus dites, 38 e que il estimassent e prisassent leyaument les diz heritages e chouses, segont ceu que il les trovereient, 39 e que il en baillassent au dit maistre Pierres par lour leyau estimacion tant que il se tenist à bien \19 payez e à bien enterinez des trente livres de cens dessus dites e de davant diz arrerages 40 à la quau davant dite estimacion e à la prisance faire, le dit Guillaume Lescuier, ob dreit esgardé e par jugement de l'assentement e de la volunté dau dit maistre Pere e de nous, 41 nous dona e \20 bailla certains prodes homes e bien dignes de fey destinez à ceu faire, 42 c'est à ssaveir: Estene Bonin e Helies Chauveau de Lardelere; 43 les quaus prodes homes, ensenbleement ob nous e ob le dit maistre Pierres, sus les dites chouses à certain jor priserent, e estimerent \21 les dites chouses bien e loyaument 44 en tau manere que nous en tenismes e tenom pour bien payez 45 en tele manere que nous, les dous freres dessus diz, par communau acort e par communau assentement 46 e par l'esgart e par l'estimacion des diz prodes homes, 47 e par dreit esgardé e \22 jugé de nostre acort dau dit Guillaume Lescuier, 48 avom baillé e laissé e quipté e otreié e baillom e laissom e quiptom e otreiom à domayne e à perpetuauté, pour nous e pour touz les noz, 49 au davant dit maistre Pere de Condac e aus sons, 50 en solucion e en raquit e en \23 rabatement des trente livres de cens dessus dites e des arrerages dessus diz e de couz e des missions que il a fait e mis ous façons e ou conobrage des chouses e heritages dessus diz, 51 le davant dit troil e le davant dit arbergement e le fonz de la terre sus quei il se\24ent e le verger qui est par detreis, 52 ob toutes lour apartenances einssi comme il sont enclous de lonc e de large ob toutes les tones e les cubes e les ancheres 53 e ob toutes les autres ozines e ob touz les autres ostillemenz qui au dit troil e au dit arbergement que nous avion \25 à Puy Liboreau apartienent e apartenir poent e devent, 54 e toutes les vignes blanches e vermeilles e la terre en quei eles sont affiees que nous aviom apartenanz au dit troil e au dit arbergement, 55 si comme eles sont expressés e devisees en l'instrument dessus dit que nous li en donas\26mes de la vençon e de l'assignacion des trente livres de cens dessus dites, 56 sauves e exceptees icestes vignes ici enprés escrites e devisees qui sont nostres e nous demorent à nostre domayne, c'est à ssaveir: 57 dous quarters de vigne vermeille qui sont ou Fié de Rocheffort par detreis le \27 dit arbergement, 58 e se tient d'une part aus vignes maquaign e d'autre part au chemin par ont l'on vait dau dit arbergement à la Gorz, 59 e does pieces de vignes vermeilles qui sont apelees les Vignes de Ahuré. 60 Dau quau davant dit troil e arbergement e dau fonz de la terre, sus quei il \28 sieent, 61 e dau dit verger qui y apartient e des quaus orifes e ostillemenz, qui dedenz sont, 62 e de toutes lour autres apartenances e de toutes les vignes dessus dites e de la terre en quei eles sont affiees, si comme eles sont ou dit instrument expressees e devisees, 63 sauves e exceptees les \29 treis pieces de vignes vermeilles dessus dites que nous avom retenues à nostre oups, si comme dessus est dit, 64 nous Nicholas e Guillaume de Forras dessus nommez, 65 de nostre bon gré e de nostre bone e playne volunté, 66 e por l'esgart e por l'estimacion des prodomes dessus diz, e por le jugement \30 fait de nostre assentement e esgardé ob dreit par le dit Guillaume Lescuier, 67 nous somes devestuz e dessaisiz des ores de tout en tout; 68 e par la baillee e par la tradicion de ceste presente chartre, e de fait e de dreit, 69 en avom vestu e saizi le davant dit maistre Pere de Condac e mis \31 en plenere corporau possession e en pasible e perpetuau sazine; 70 e de tout le dreit e de tout le domayne e de toute la proprieté que nous e chascun de nous por sei, conjonctement ou deviseement, y aviom e que aveir y poyom ou deviom, por quauconque raison e por quaucumque cause que ceu seit, \32 71 nous avom fait e faisom des ores au dit maistre Pierres e aus sons plenere e enterine cession e generau e perpetuau guerpiment e quiptance en ceste presente chartre, 72 à tenir e à aver e à expleiter e à posseyer à domayne e à durableté, à lui e à ses heirs e à ses successours \33 e à lour comandement, 73 e à faire en toute lor volunté delivrement e plenerement, à vie e à mort, 74 sanz contredit e sanz partie e sanz dreiture e sanz raison ne reclamacion aucune que nous ne noz heirs ne autres por nom ^[1] ne por cause de nous 75 hy puissom aveir ne avo\34her ne prendre ne demander, ne enpeschement ne destorbance ne aucun debat faire lor hy, 76 ne metre ja mais en nul temps par nule manere por les davant dites trente livres de cens e por les arrerages dessus diz 77 e por les couz e mises que il a fait e mis ou conobrage des dites qui \35 sont amortiz e aneentez de tout en tout, 78 e de quei nous e toutes les noz autres chouses somes e demorom quiptes e delivres touz jours mais, perpetuaument envers le dit maistre Pierres e envers touz les sons, 79 en tau manere, toutesveies, que le dit maistre Pierres, ob nostre as\36sentement e ob nostre volunté, 80 à bien retenu e retient le davant dit instrument e touz les mouz e les articles e les obligacions qui dedenz sont contenuz, devisez e escriz, saus en toutes chouses, 81 sanz estre deblecez ne enpirez en riens por raison de cest noveau contrait, 82 pour en user e ovrer \37 toutes les feiz que à lui e aus sons plaira e que mesters lour en sera, 83 e por en aveir plener joyment envers nous e envers les noz e envers noz biens e noz chouses toutes les feiz que enpeschement ou destorbance ou aucune demande lour sereient fait ou quis ou mis ous chouses dessus dites \38 ou en aucunes d'eles, si nous defailliom de lour en faire gariment, 84 e por ruser e forcloire touz perturbeors e inquieteours e demandeors por la force e por la vertu de sa premere obligacion; 85 les quaus toutes davant dites chouses e chascune por sei e le fonz de la terre sus quei il sieent, \39 86 nous les dous freres dessus nommez prometom e somes tenu, souz l'obligacion de touz noz biens e de toutes les noz chouses, celes que nous avom e que nous avrom, quauque part qu'eles seient e seront, tant moubles quant non moubles, e chascun de nous por le tout, 87 garir e deffendre \40 durablement au dit maistre Pierres e à ses heirs e à ses successors e à lour comandement, e de les en tenir en bone e pasible e perpetuau saisine, 88 contre touz e vers touz franchement, quiptement, pasiblement e delivrement de touz deveirs, de toutes deptes, de toutes obligacions, de totes \41 ventes, de touz alïenement e de touz autres enpaistremenz, 89 ob la dreite cense e ob les autres anciens deveirs qui sus les dites vignes e sus les dites chouses sont deüz, sanz riens plus. 90 E lour seriom autressi tenuz, souz l'obligacion dessus dite e chascun de nous por le tout, 91 de lor \42 rendre e amander couz, missions e damages, se il les y aveient en plaideant ou en autre manere por deffaute de gariment, à lor sacrement ou de celui qui ceste chartre aportera sanz autre prove. 92 E avom renuncié en icest nostre davant dit fait, en tout e por tout, nous les \43 dous fre[re]s dessus nommez, à toute excepcion de fait e de dreit e de decevance e à touz privileges de croiz donez e à doner 93 e à touz les autres dreiz escriz e non escriz qui de fait ou de dreit nous porreient ayder à venir encontre, fust en court d'iglise ou en court laye. 94 E tout ceu avom \44 juré sus les Sainz Evangiles Nostre Seignor à tenir e à garder bien e leyaument, sanz ja mais venir encontre por nous ne por autres por nulle manere. 95 E en garentie de ceste chouse, nous les dous freres dessus nommez en avom doné au dit maistre Pere de Condac ceste presente char\45tre, 96 la quau maistre Johan Berenger clerc, tenant adonques en la Rochele le saeau de la seneschaucie de Xainctonge pour nostre seignor le rei de France 97 en qui juridicion nous sozmetom nous e toz noz biens, quant à cest fait, sanz autre seignorie avoher 98 saela, à noz requestes, \46 dau dit saeau. 99 E Guillaume Lescuier dessus diz y a apousé autressi, à noz requestes, son propre saeau. 100 E ge Johan Berenger, à la requeste daus diz freres, ai appousé à ceste chartre le dit saeau, sauve le dreit le rei e l'autrui. 101 E ge le dit Guillaume Lescuier y ai aussi apposé, \47 à lour requeste, le mien propre saeau; 102 e de tout ceu que dessus est devisé, de lour assentement, les avom jugé ob dreit e condampné à le tenir perpetuaument. 103 À ceu oïr e otreier, furent apelez à garenties: Jehan de Revene, maistre Bernart Borgoing, Phelipon Breton \48 e Johan Daussoire, clercs. 104 Ceu fut fait e doné le samadi enprés la feste saint Vincent, l'an de grace .M.CC. quatre vinz e dis e sept ou meis de janvyer.

Notes de transcription
^[1] pornomécrit deux fois .