Téléchargement du document

Documents linguistiques galloromans
Corpus : (chPoit)
Responsable du corpus : -
Édition de la charte : -

chPoit073

1300, 22 octobre.

Type de document: Charte: accord

Objet: Accord fait entre Phelipon Rigaut, valet, et l'abbaye de Fontaine-le-Comte réglant leur différend au sujet de dix setiers de froment reçus par le couvent et mouvant des terres du dit Phelipon Rigaut.

Support: Charte autrefois scellée.

Lieu de conservation: Archives Départementales de la Vienne, H, Abbaye de Fontaine-le-Comte, liasse 28.

1 Sachent tuit presenz e à venir 2 que en la court le rey de France à Lodun par davant nous en droit personement \2 establiz, 3 Phelipum Rigaut, valleit, recognut que, come contez fust esmeüz, ou vossist esmoveir, en\3tre luy d'une partie, 4 e religious homes l'abbe e le convent de la Fonteine le Conte en la dyocese de Pey\4tiers de l'autre, 5 sus ce que il les vouloit parforcier de meitre hors de lour mein dez sextiers de froment de moeson \5 à la mesure de Lodun; 6 les queus Johan Araut avoit assis aus diz religious, si come le dit Phelipum disoit, \6 sus terres assises au fié au dit Phelipum en la parroisse de Aunay, entre les terres Hugueit de Lueins d'une par\7tie, e la voie par la quelle l'en vait de Aunay à Marteisé de l'autre partie; 7 les quelles terres estoient te\8nues dou dit Phelipum Rigaut, si come il disoit, à dous souz e dous deners e à treis chapons de rente; \9 8 e les diz religious disoient e proposoient por meintes raysons encontre; 9 à la parfin, aprés mout de \10 contenz e de altercacions eüz entre ous, fut faite paiz e acordee entre ous des diz contenz en la \11 menere qui enseit, si come le dit Phelipum cognut davant nous. 10 Ce est à ssavoir que le dit Phelipum vost e otreia \12 e se consentit davant nous, de sa pure volanté e de son ben gré en reconpenssacion e en guer\13redon dou ben servige que les diz religious li ont fait, si come il disoit, e pour Deu e pour le salu de \14 s'ame, 11 que les diz religious e lours successours aient e tiengent des ores en avant, paisiblement, \15 sanz contredit de luy ne de ses heirs, la moeson davant dite assise sus les dites terres perpetuement \16 e heriteement, à toz jourz mes, 12 aus davant diz dous souz e dous deners de cens e ans treis chapons \17 de rente rendables à luy e aus siens des diz religious e de ceous qui ont e auront cause de ous, \18 aus termes où il avoient estié acoustumé anciennement estre renduz au tenps passé. 13 E vost ancores \19 e otreia pour luy e pour ses heirs que les diz religious e lours successours aient e tiengent à toz jourz mes \20 paisiblement toutes les autres chouses que il avoient achatiees e acquises en ses fiez au tenps passé, en rendant \21 à luy e à ses heirs les devoirs acoustumez des dites chouses, 14 sanz ce que il ne ses heirs les puisse, des ores \22 en avant, parforcier de meitre hors de lour mein les dites chouses ne aucune d'icelles, 15 sauve toutes\23voies e retenue au dit Pphelipon se obeïssance de fié, si come il a acoustumé à aveir, sus les dites chouses. \24 16 Toutes les quelles chouses davant dites e chescune d'icelles, le dit Phelipum promist e est tenuz \25 par sa foy en nostre meyn donee e sus l'obligement de touz ses biens moibles e non moibles, presenz \26 e à venir, garentir e deffendre de touz e contre touz, à toz jourz mes, aus diz religious, tant \27 come seignour de fié tant soulement. 17 E promist ensurquetout, par sa foy en nostre meyn donee, que il ne ven\28dra jamés, ne ne fera venir por sey ne por autre contre ceite paiz ne contre la tenour de ceites \29 leitres por nulle rayson ne por nulle cause. 18 E abrenuncia, quant à ce, pour sey e pour ses heirs, que il obligea \30 à ce tenir, que il ne vengent jamés, ne ne faeint venir por sey ne por autres contre la tenour de ceites \31 leitres, à toute excepcion de barat, de decepcion, e en fait e à tout aide e benefice de droit \32 escrit e non escrit, 19 à tout privileige de croiz e à tout autre privileige doné e à doner, à tot \33 usage e coustume de païs contraires e à toutes autres raisons e allegacions de droit \34 e de fait pour les quelles ceites presentes leitres porreient estre destruites e a\35nullees en tout ou en partie. 20 E nous le dit Phelipom davant nous present e consentant \36 de ce tenir e garder, sanz jamés venir encontre, avon condampné e jugé par \37 le jugement de la court le rey. 21 Ce fut fait e doné à Lodun à la requeste do dit \38 Phelipom, e saellé dou seau le rey dou quel l'en use à Lodun, 22 le semadi avant la feste \39 de saint Symon e Jude, l'an de grace mil e treis cenz.