Téléchargement du document

Documents linguistiques galloromans
Corpus : (chPoit)
Responsable du corpus : -
Édition de la charte : -

chPoit063

[vers 1280?]^[a]

Type de document: Charte: bail

Objet: Bail à ferme donné par l'Abbaye de Fontaine-le-Comte à Johan le Tort de plusieurs biens ayant appartenu à feu Pierre Fouqué, prêtre.

Support: Charte autrefois scellée. En mauvais état. La fin de plusieurs lignes manque vers le bas et, par conséquent, les derniers éléments de la date.

Lieu de conservation: Archives Départementales de la Vienne, H, Abbaye de Fontaine-le-Comte, liasse 26.

1 À toz celz qui verront et orront ceites presentes leitres, 2 Geiffrey Leiscrivain, clerc, porteor dou seau noble Yolent, \2 dame de Mirebeau et de Blazon, à Mirebeau establiz, salu en Nostre Seignor pardurable. 3 Sachent tuit present et à venir que en nostre \3 presence personaument establiz, 4 Johan lou Tort de la cloistre en Gironde a queneu et confessé, en nostre presence et par davant nos, 5 que \4 il a pris à moyson et à ferme, et par son proufeit sus çou regardé, de l'abé et dou convent de la Fontainne lou Conte les heritages \5 et les choses qui seront bas deviszees en ceites presentes leitres, 6 les quaus heritages et choses furent jadis feu Perres Fouques, \6 prestre, à annuau et perpetuau moyson de sex sexters de froment de moyson et sex manseys à la mesure de Mirebeau; 7 c'est à saveir: \7 un herbergement assis en la Bertonerie joste la mayson feu Guillame de Mauszé et joste la mayson feu Pierres Gaudri, prestre; 8 et une \8 roche assisze davant lou dit herbergement que tient Michau Desme, si come l'an dit; 9 et un autre herbergement assis au poiz aus \9 hermites en la Bertonerie que tient, si come l'an dit, Perrenelle de Varennes; 10 et un autre herbergement assis de joste lou four de bille \10 que tient, si come l'an dit, la Moyzenne; 11 et une mayson assisze au fossé Saint Hilaire que tient joste la mayson à la Jarrie que tient \11 Johan Lespeignon, si come l'an dit; 12 et une roche assisze au fossé Saint Hilaire que tiennent Guillame Giraut et sa fame, si come l'an \12 dit; 13 et une piece de terre assisze à la Croiz Grolea au quarrefour par où l'an vait à Poligné et à Chauverole que tient Aymeri dou \13 molin, si come l'an dit; 14 et une piece de terre assisze au desouz de la Fontainne de la Folie joste la terre aus aumonners que tient, si \14 come l'an dit, la fame feu Thomas Baricaut; 15 et toz autres heritages quaus que le dit feu prestre poeit aveir en quauque lou que çou fust; \15 16 et que par rayson dos diz heritages le dit Johan et li sien en seront teinu rendre chasqun an en la feste saint Michau aus diz \16 abé et au convent ou à lor comandement en la ville de Mirbeau les diz sex sextiers de froment et sex manseys. 17 Et rendront et \17 seront tenu rendre ensorquetot le dit Johan et li sien toz les deveirs, quaus que il seient, qui sont deü dos diz heritages aus seignori\18es de qui il movent, quaus que les diz deveirs seient. 18 Et si enssi estoit que le dit Johan ou li sien deffallissent de rendre la dite moyson \19 en auqune annee en la feste saint Michau, le dit abe et lou convent ou lor comandement porreient prendre, seszir et aresteir leis diz \20 heritages jusque à tant que il fussent porpaez chasqun, si come le dit Johan a queneu, totes les choses desus dites par davant nos. 19 Et a pramis \21 le dit Johan par sey et par les siens, par la fey de son cors donee en nostre mayn et sus l'obligacion de toz ses biens moubles et heritages, les \22 dites choses tenir, attendre et gardeir feaument et fermement, sanz enfraindre et sanz venir encontre, au temps qui est à venir, \23 par auqun droit ou par auqune rayson. 20 Et a renoncié le dit Johan, quant aus dites choses, à tote aïue, à tot benefice de dreit de cort \24 d'iglisze et de cort laye et à toz establissemenz faiz et à faire et à toz privileges donez ou à doneir et à totes excepcions, decepcions, \25 privileges, confirmacions, raysons et allegacions qui de fait ou de dreit porreient estre dites ou oubicees contre la tenor de ceite[s] \26 presentes leitres. 21 Et en guarantie des dites choses nos, à la requeite dou dit Johan present et quenoissant totes [...] \27 par davant nos aus presentes leitres lou dit seau apposzames. 22 Et aus choses desus dites tenir, attendre et gard[er] [...] \28 lou condampnasmes suveraument et passames par lou jugement de la cort à la dite dame. 23 Çou fut fait e [...] \29 jugé à tenir en jor de mercredi en la veille dos Roveysons en l'an de graice mil dus cenz q [...].

Notes de fiche
^[a] Cette indication sur la date de l'acte se trouve dans l'inventaire manuscrit aux Archives de la Vienne (N° 18, p. 38^ro).