Téléchargement du document

fichier xml fichier pdf

Documents linguistiques galloromans
Corpus : (chAub)
Responsable du corpus : -
Édition de la charte : -

chAub095

1270, octobre.

Type de document: Charte: vente.

Objet: Même acte que le n^o 94 établi au nom et sous le sceau d'Étienne Tâte-Saveur, bailli de Sens.

Auteur: Étienne Tâte-Saveur, bailli de Sens.

Sceau: Étienne Tâte-Saveur, bailli de Sens.

Support: Parchemin jadis scellé sur lacs de soie.

Lieu de conservation: Archives départementales de l'Yonne, H 1462 (fonds de l'abbaye de Pontigny).

Édition antérieure: A. Du Chesne, 1624, Histoire de la maison de Montmorency, Preuves, Paris, p. 120, édition partielle; D. Coq, 1988, Documents linguistiques de la France. III. Aube, Seine-et-Marne, Yonne, p. 106-113.

Verso: Carta Stephani dicti Tate Saveur, baillivi Senonensis, que testatur emptionem sexcentorum et quadraginta quinque arpentorum nemoris quam fecimus a domino Erardo de Brena domino Venisiaci. LXXXX. (Fin XIII^e s.). — Chailly (XIV^e s.).

1 À touz ces qui verront ces presentes letres, 2 Estienes, diz Taste Savor, bailliz de Senz, salut en Nostre Seignor. 3 Nos faisons savoir à ces qui sunt et qui seront \2 que, en nostre presence por ce especiaument establiz, Erarz de Brene, chevaliers, sires de Venisi, ha reconeu que il ha vendu, otroié et quité en pur et en franc \3 allué et en main morte 4 à l'abé et au covent de Ponteigni, de l'ordre de Cistiaus, à tenir à touz jorz de ces devant diz l'abé et lou covent, frainchement et \4 quitement, en franc allué et en main morte, 5 sis cenz et quarente cinc arpenz de bois, à l'arpent de Champaigne, c'est à savoir lou bois seur terre et lou \5 fonz de la terre avuec, les quex sis cenz et quarante cinc arpenz de bois et lou fonz de la terre et lou bois seur terre cil devant diz chevaliers avoit et tenoit \6 en franc allué, si cum il reconut par devant nos, assis ajoignant d'une part au bois à ces de Pontigni que l'en dit la Queue de Burs et à deux cenz \7 arpenz qui furent mon seignor Henri de Brene qui fu peres au devant dit Erart, et d'autre part joignanz au bois qui furent mon seignor Mathé de Mont\8moranci qui fu sires de Sant, por mil et sis cenz et douze livres de tornois, chascun arpent, c'est à savoir lou bois seur terre et lou font, por cinquante \9 solz de tornois; le quex deniers li devant diz Erarz ha receuz anterinement de l'abé et dou covent devant diz, si cum il l'a requeneu par devant \10 nos, et les en ha quitez et leur successors et l'iglise de Pontigni expressement par devant nos; 6 e ha promis par sa foi donee en nostre main que il \11 ne demandera jamais riens de ces deniers à ces de Ponteigni ne à loz ^[1] successors. 7 Et ha requeneu par devant nos qu'il s'est devestuz dou tout dou \12 devant dit bois vendu et en a revestu l'abé et lou covent devant diz et les en ha mis en corporel saysine et en paisible et plaine possession; et est \13 tenuz à faire mesurer à ses couz et à ses despens et delivrer celui bois mesuré à ces de Ponteigni plainemant et parfaitemant. 8 Et ha promis par \14 sa foi que il garantira, delivrera et deffendra à touz jourz en ver toutes genz à l'abé et au covent ^[2] devant diz et à leur eglise et à leur successors les de\15vant diz sis cenz et quarante cinc arpenz de bois venduz en franc allué et quites et frans de touz fiez, de touz rierefiez, de doaire, de gruerie, de ser\16vaige, de pension et de costume, sauf lou pasturaige à ces qui l'i doivent avoir; ne n'i porra ne devra nus autres mas que li dit religieux copper ne \17 mener en nul tens ne vert ne sec, ne por maisonner ne por ardoir, ne por autre chose faire, quar quant à ces choses est li devant dit bois frans, \18 et en ceste franchise lor doit garantir à touz jourz li diz Erarz par sa foi bailliee et si hoir ausinc, si com il l'a promis par devant nos. 9 Et avront \19 li devant dit l'abes et li covenz et lor successor la jotise et la seignorie dou dit bois vendu, et i-metront foretiers à lor volenté qui porront porter arz, \20 et i-porront chacier et mener chiens et penre venoison et mener leur bestes et metre à paiture en tout tens, et lever touz forfaiz et esploitier en to\21tes menieres dou devant dit bois cum dou leur propre, sauf ce que li diz Erarz i-a retenu por lui et por ses hors la chace quant il i-voudront chacier, \22 senz haye faire et senz domaigier lou bois; 10 et i-a retenu la grant jotise, c'est à-savoir lou rapt, lou murtre et lou larron, la quele jotise li de\23vant diz Erarz et si hoir ne porront ne devront faire des convers de Ponteigni ne des sergenz seculers qui sunt ou qui seront au pain et au sel \24 de Ponteigni, se cil sergent n'estoient pris es presenz forfaiz ou s'il ne requenoissoient lor meffaiz senz destraindre. 11 Ne ne porra ne devra li diz Erarz \25 ne si hoir ne leur gent prenre ne faire prenre ne espletier de rien ou dit bois mais que es trois cas devant diz qui espartiennent à la grant jo\26tise, ne n'i porront ne devront forches lever pour nule raison ne faire autre chose qui soit à la honte ne au domaige de Ponteigni. 12 Et porront li dit \27 religieux clorre et faire clorre lou dit bois de tele closure cum il voudront. 13 Et ha promis li diz Erarz par sa foi, pour lui et pour ses hoirs, que quant \28 li rois de France sera venuz d'Outre mer, cil Erarz ou si hoir procureront à leur couz et à leur despens, dedanz l'an puis qu'il en avront esté requis \29 de par les diz religieux, les letres dou devant dit mon seigneur lou roi, ou de sun hoir s'il ne revenoit, de la vendue devant dite et de la garan\30tie et de la delivrance et de la deffension et des covenances desus dites, et les bailleront et delivreront au diz l'abé et lou covent. 14 Et ha promis \31 li diz Erarz par sa dite foi que se cil de Ponteigni avoient ne domaiges ne deperz ne s'il faisoient despens por ce que li diz Erarz ou si hoir deffailissient \32 de faire et de acomplir et de procurer la garantie, la deffension, la delivrance et les letres dou roi desus dites, li diz Erarz ou si hoir leur ren\33droient et restabliroient enterinement. 15 Et ha outroié li diz Erarz par devant nos et l'a requis que se il ou si hoir deffailoient en faire ou en \34 acomplir parfaitement toutes les choses et les covenances desus dites ou aucune de celes, que nos et cil qui seront apré nos bailly de Senz \35 puissiens et doiens penre et faire penre et detenir leur biens, muebles et non muebles, en quelque leu qu'il soient, senz rendre et senz recroire \36 jusques à tant qu'il haient parfait et acompli ces covenances si com eles sunt desus dites et qu'il haient rendu touz les couz, les domaiges, les deperz \37 et les despens que cil de Ponteigni avront fait pour lou deffaut dou dit Erart ou de ses hoirs es choses desus dites; des quex despens, couz et do\38maiges et deperz li diz Erarz viaut et otroie par sa foi, por lui et pour ses hoirs, que li procurieres de Ponteigni soit creuz par son sairement \39 senz autre prueve amener. 16 Et ha promis li diz Erarz par sa foi que il parfera et acomplira et gardera totes les choses desus dites et totes les covenan\40ces por les queles parfaire, acomplir et garder dou dit Erart et de ses hoirs, i_cil Erarz ha obligié par devant nos espetialment et expressement \41 à ces de Ponteigni et à leur successeurs lui et ses hoirs et toute sa terre et touz ses biens, muebles et non muebles, presenz et à avenir, en quel\42que leu qu'il serunt ne porront estre trové, et ha promis par sa foi qu'il ne venra contre ceste obligation ne par lui ne par autrui. 17 Et ha re\43noncié par sa foi, por lui et por ses hoirs, en ces choses et en ce fait à totes exceptions, à totes raisons et allegations de droit et de \44 fait ou de coutume ou de eaige, à totes indulgences, à touz respiz et à totes graces empetrees et à empetrer, donees et-à-doner, et me\45ismement à cele exception par que li diz Erarz ou si hoir porroient dire ou proposer que cil Erarz eust estez deceuz en ce marchié \46 outre la moitié dou droit pris ou de la valeur dou dit bois, et à totes autres choses et raisons qui porroient estre dites ne propose\47es contre ces choses desus dites ne contre ces letres et qui porroient en ce fait eidier au dit Erart ou à ses hoirs et à ces de Ponteigni \48 ou à leur successors nuire ou grever. 18 Et pour ce que totes ces choses soient fermes et estables, nos avons seelees ces presentes letres \49 de nostre seal en leal tesmoignaige, à la requeste dou devant dit Erart, chevalier, 19 en l'an de Nostre Seignor mil et .CC. et sexante dis, ou \50 mois de oictobre.

Notes de transcription
^[1] Sic pour lor.
^[2] D'abord écrit covenz.