Téléchargement du document

Documents linguistiques galloromans
Corpus : (chAub)
Responsable du corpus : -
Édition de la charte : -

chAub089

1270, 22 juin.

Type de document: Charte: donation.

Objet: Donation par Renaut de Bar[-le-Duc], chevalier, en faveur de l'Hôtel-Dieu-le-Comte de Troyes, d'une rente de 200 livres de provenisiens forts à prendre sur son droit de portage des vins à Troyes, relevant en fief de Thibaut [V], roi de Navarre et comte de Champagne, ainsi que d'une maison, sise à la Porte-le-Comte, dans la Juiverie, destinée à l'accueil des femmes malades et où sera célébrée, chaque jour, pour le repos de son âme, une messe du Saint-Esprit, de son vivant, une messe de Requiem, après sa mort.

Auteur: Renaut de Bar[-le-Duc], chevalier.

Sceau: Renaut de Bar[-le-Duc], chevalier.

Bénéficiaire: L'Hôtel-Dieu-le-Comte de Troyes.

Support: Parchemin scellé sur lacs de soie rouge d'un sceau rond de cire brune dont il subsiste la moitié.

Lieu de conservation: Archives départementales de l'Aube, 40 H 1 (fonds de l'Hôtel-Dieu-le-Comte de Troyes).

Édition antérieure: A. Du Chesne, 1631, Histoire de la maison de Bar-le-Duc, Preuves, p. 37; D. Coq, 1988, Documents linguistiques de la France. III. Aube, Seine-et-Marne, Yonne, p. 97-99.

1 Je, Renaus de Bar, chevaliers, 2 faz savoir à touz ciaus qui ces presentes lettres verront et orront 3 que je doing et ai donei et otroié pour Dieu en aumosne pour la \2 remission de mes pechiez et de mes ancessours perpetuelment à la Maison Dieu de Troies, c'on dit la Maison le Conte de Troies, 4 deus cens lib. de rente de fors de Champaigne \3 provenisiens à penre chascun an perpetuelment ens portages des vins de Troies, à deus paiemens en l'an, c'est à savoir au paiement de la foire de Bar sus Aube, cent \4 lib., et à la foire de Troies, à la Saint Jehan Baptiste, les autres cent lib., les quelz deus cens lib. je tieng en fief et en homage de tres noble home mon tres chier signor \5 Thiebaut, par la grace de Dieu roi de Navarre, de Champaigne et de Brie conte palazin; 5 et ma maison de Troies qui muet dou fief mon signor devant dit, c'on apelle la maison \6 le Conte, et le pourpris de la maison tout, la queile maisons et li pourpris siet à la porte le Conte, à la Gievrie, en teile maniere que je vuel que li maistres et li freire \7 de la Maison Dieu devant dite fundent une chapelerie à perpetuitei, sans faillir, en la maison que je lor ai donee en l'onour et en nom de la gloriouse benoite Virge \8 meire Dieu, et qu'il facent enqui chascun jor perpetuelment le saint service Dieu et chantent une messe dou Saint Esperite à ma vie et une de Requiem aprés mon decés; \9 6 et vuel que en nom de la benoite Dame en cui nom la chapelerie iert fundee, qu'il facent hopitalitei perpetuelment en la maison devant dite que je lor ai donee, et qu'il \10 n'i herbergent se fames gisans non et malades et nul autre home, et leur charge et enjoing sus le peril de leur armes qu'il n'i mettent ne reçoivent à hospitalitei \11 faire, fors-que fames purement; 7 et ce don et ceste aumosne ai je faite par le grei et l'otroi de mon chier signor devant dit et si l'ai proumis à tenir bien et loialment, fer\12mement et establement, pour moi, pour mes hoirs et pour mes successours perpetuelment, sans rapel de moi ne d'autrui, de ce jour en avant. 8 Et pour ce que ce soit fer\13me chose et estable ai je seelees ces presentes lettres de mon propre seel en tesmoingnage de veritei, 9 qui furent faites et donees l'an de l'Incarnation Nostre Signor \14 que li milliaires courroit par mil deus cens et sexante et dis, le dimenge devant la Nativitei saint Jehan Baptiste, ou mois de joing.