Téléchargement du document

Documents linguistiques galloromans
Corpus : (chAub)
Responsable du corpus : -
Édition de la charte : -

chAub076

1270 (n. st.), 30 mars.

Type de document: Charte: assignation.

Objet: Assignation par Th[ibaut V], roi de Navarre et comte de Champagne sur son droit de portage de Provins, de deux rentes, l'une de 22 livres au doyen et au chapitre de Saint-Quiriace de Provins, l'autre de 22 livres de cire au trésorier du même chapitre, pour décharger les frères Prêcheurs du versement de rentes équivalentes, qu'une décision de Pierre [IV de Charny], archevêque de Sens, leur avait enjoint de payer pour dédommager lesdits doyen, chapitre et trésorier, de l'installation d'un couvent de prêcheurs dans la paroisse Saint-Pierre de Provins.

Auteur: Th[ibaut V], roi de Navarre et comte de Champagne.

Sceau: Th[ibaut V], roi de Navarre et comte de Champagne.

Bénéficiaire: Le doyen, le chapitre et le trésorier du chapitre de Saint-Quiriace de Provins.

Autres Acteurs: Les frères Prêcheurs.

Support: Parchemin scellé sur lacs de soie rouge d'un sceau rond de cire rouge (H. d'Arbois, 1859-1876, Histoire des comtes de Champagne, t. IV, p. 874, 2^e type).

Lieu de conservation: Bibliothèque municipale de Provins, ms. 87, n^o 1 (fonds Michelin).

Édition antérieure: M.-D. Chapotin, 1898, Histoire des Dominicains de la Province de France, p. 591, note 2; M. Veissière, 1961, Une communauté canoniale au Moyen Age: Saint-Quiriace de Provins…, p. 160-161; D. Coq, 1988, Documents linguistiques de la France. III. Aube, Seine-et-Marne, Yonne, p. 81-83.

Verso: [Littera] regis Theobaldi super .XXII. lb. tur. pro Jacobitis pruveniensibus […] solvendum ad festum sancti Remigii et pro .XXII. lb. tur. pro thesaurario; duplicata est (XIV^e s.).

1 Nous, Thiebauz, par la grace de Dieu rois de Navarre, de Champaingne et de Brie cuens palazins, 2 faisons savoir à touz çaus qui verront et orront \2 cez presentes letres 3 que, com li prieurs provinciaux et li frere de l'ordre des Freres Prescheeurs de France voussissent à nostre requeste edefier un couvent \3 de leur ordre en nostre vile de Prouvinz en place que nous leur aviens donnee en la parroisse Saint Pere, et li curé ^[1] de la dite parroisse et li daiens et \4 li chapitres de Saint Kyriace se meissient en l'ancontre pour-ce que il disoient que la parroisse en seroit durement damagie car li dit frere occuperient mout \5 de maisons et de places es queles habitoient ou pourroient encores habiter mout de parroissiens, et einsi par leur venue la parroisse amenuiseroit, et avec \6 ce, li frere recevroient offerendes à l'autel et autres obvencions et cors à sepouture par quoi la parroisse avroit moins et offerendes et sepoutures, et ainsi la par\7roisse en enpirroit el damage et el grevement des devant diz curez et dou daien et dou chapitre de Saint Quiriace qui sont patron de la dite \8 parroisse, et chacun an prenoient en ladite parroisse vint et une livre de pension et vint souz à la feste saint Pere pour la proucession, et vint \9 et deux livres de cire pour lou tresorier, 4 à-la-parfin il fu ainsi ordené par nostre ennourable pere Pierre, par la grace de Dieu arcevesque de Senz, \10 que li dit Frere Preescheeur rendroient, par soi ou par autres, à tourjourz mais chacun an au daien de Saint Kyriace les vint et une livre de pension \11 pour les devant diz curez de Saint Pere et les vint souz de pension pour la proucession et les vint et deus livres de cire au tresorier, et par ce ren\12dant, la rente que li daiens et li chapitres et li tresoriers avoient sus la parroisse leur seroit sauve et li curé seroient quite de toutes cez choses, \13 et li frere pourroient en-leur place franchement edeffier et eglise et maisons et ce que il leur couvendroit, et chanter et recevoir offerendes et \14 recevoir les cors à sepouture, sauf ce que li devant dit frere ne pourroient riens acquerre es censives de Saint Kyriace se il ne faisoient au daien \15 et au chapitre couvenable reconpensacion. 5 Et en ceste ordenance s'acorderent li daiens et li chapitres de Saint Kyriace et li Frere Preescheeur, et feimes \16 les freres en nostre presence, dou consentement des devant diz daien et chapitre, chanter messe en leur place de Prouvinz à cloche pendue et sonnant. \17 6 Et nous, pour le remede de nostre ame et de noz ancesseurs, en aquitance des devant diz freres qui sont povre homme, pour garder l'eglise de Saint \18 Kyriace, qui est nostre, de grevement et de damages, pour acquiter vers aus quant aus pensions devant dites et quant aus curez et quant aus freres, \19 pour les freres, en non et en-leu des freres devant diz, asseons et assenons aus devant diz daien et chapitre de Saint Kyriace vint et deux livres de \20 rente en deniers contanz à penre pardurablement chacun an, le jour de la Saint Remi, en nostre portage de Prouvinz, desquiex il departiront chacun \21 an vint souz, le jour de la Saint Pere, à leur proucession, einsi comme il soloient, et asseons et assenons au tresorier de Saint Kyriace pour acquitance des \22 curez de Saint Pere et des devant diz freres, en leu et en non des devant diz freres, vint et deux livres de cire de rente pardurablement, à penre \23 chacun an sus le dit portage de Prouvinz, le jour de feste saint Remi. 7 Et quant à cez choses devant dites fere rendre, si comme il est devisé, obli\24gons nous et noz hoirs et voulons que tourjourz mais cil qui lou portage de Prouvinz tenront de nous ou de noz hoirs ou de noz successeurs \25 soient tenu à rendre chacun an les choses devant dites aus personnes et aus terme en la maniere que il est ci desus devisé. 8 En tesmoingnage de la quele \26 chose et pour-ce que ceste chose soit ferme et estable à tourjourz mais, nous avons fet metre nostre seel en cez presentes letres, 9 qui furent donnees par nous \27 à Prouvinz en l'an de grace mil deux cenz sexante et nuef, el mois de marz, lou diemenche devant Pasques flouries.
10 ^[2] Symon per fratrem Symonem de Valle.

Notes de transcription
^[1] Le zfinal a été gratté.
^[2] Sous le repli, dans le coin inférieur droit.