Téléchargement du document

Documents linguistiques galloromans
Corpus : (chFlan)
Responsable du corpus : -
Édition de la charte : -

chFland028

1264, décembre.

Type de document: Charte: abandon.

Objet: Abandon par Hugues, chevalier, châtelain de Gand, et par son fils, Hugues, aux termes d'un accord avec l'abbaye de Marke et moyennant le versement par les religieux d'une indemnité de cent dix livres de monnaie de Flandre, de la dîme qu'ils revendiquaient en qualité de seigneurs de fief sur une terre nouvelle située à Vroondijke, entre la digue de l'abbaye de Marke et celle de l'abbaye d'Affligem, que les religieux affirmaient avoir reçue en aumône des comtes de Flandre.

Auteur: Hugues, chevalier, châtelain de Gand, et Hugues, son fils.

Sceau: Hugues, chevalier, châtelain de Gand, et Hugues, son fils.

Bénéficiaire: L'abbaye de Marke.

Support: Parchemin jadis scellé sur double queue de deux sceaux.

Lieu de conservation: Archives de l'État à Courtrai, Abbaye de Groeninge, Chartes, n^o 22.

Édition antérieure: R. Mantou, 1987, Documents linguistiques de la Belgique romane. II. Flandre occidentale et Flandre orientale, p. 36-38.

1 Jou, Hue, chevaliers, castelains de Gant, et jou, Hue, ses fius et ses hoirs, 2 faisons à savoir à tous 3 ke, conme querele et \2 contens eust estei longement entre nous, d'une part, et l'abeesse et le couvent del abie de Marke encoste Courtrai, del orde\3ne de Cysteaus, d'autre part, pour l'okison d'une disme ke nous calengiens et demandiens de terre novelement dikie, ki gist en \4 le parroche de Vroendike, seur le meir, encoste leur autre terre, entre leur dic et le dic les monies de Hafflenghiem, 4 le quele terre \5 li abeesse et li couvens de le maison devant dite avoient donee à dikier à gens dou siecle, et nous i demandiens no disme par \6 le droit dou fief ke nous tenons dou segneur de Tenremonde, ensi ke nous disiens, et li abeesse et li couvens de le maison de\7vant dite estoient encontre et disoient ke eles l'avoient et tenoient par don d'aumosne ke li cuens Thumas et li contesse Jeha\8ne lor avoient donee, 5 à le pardefin, nous celi calenge de le terre devant dite, par le los de boene gent et par le consel de no conmun \9 lignage, avons cuitee boenement, par pais faisant, parmi cent et dis lib. de le monoie de Flandres ke nous en avons reciut en \10 boen paiement, et des queus deniers nous nos tenons bien a paiés del abeesse et dou couvent devant dit, en boene monoie et bien \11 contee. 6 Et quitons par foi et par sairement tout le droit ke nous i demandiens et toute le disme entirement et les apendances et \12 quanke nous i aviens u avoir poiens par quel droit ke ce fust. 7 Ceste couvenence et ceste cuitance avons nous en couvent à tenir loi\13aument par foi et par serement, tout ensi ke deseure est dit et promis, sour paine de ciunc cens lib. de le monoie de Flandres, \14 ke jamais ne querrons art ne engien ne okison, par nous ne par autrui, par quoi li maisons de Marke devant dite en puist estre \15 agrevee ne adamagie. 8 Et s'il avenoit en aucun tans, par aucune maniere, ke ja n'aviegne, ke nous u no hoir alissiemes encontre ce \16 ke deseure est dit, u en tout u en partie, nous seriens enkeut en paine de ciunc cens lib. de le devant dite monoie, des queles \17 li sire de le terre doit avoir le moitié pour nous constraindre à faire tenir ceste couvenence et ceste cuitance tout ensi ke deseure est dit, \18 et li autre moitiés doit demorer à le maison de Marke devant dite, ne ja pour çou ne demoerroit ke li couvenence et li cuitance de\19vant escrit ne demorassent ferm et estable à le maison de Marke devant dite, tout ensi ke deseure est deviseit. 9 Et prions et \20 requerons à no chiere dame Margherite, contesse de Flandres et de Haynau, de cui li disme et toute li terre devant dite descent \21 souvrainement, et à Robert, son neveu et son foiable segneur de Tenremonde, ke il-ceste couvenence et ceste cuitance loent et gre\22ent et conferment par leur lettres et destraignent, se mestiers estoit, nous et nos hoirs au faire tenir fermement tout ensi ke \23 deseure est dit. 10 Et pour çou ke toutes ces choses soient fermes et estables, nous en avons dounei ces presentes letres al abeesse et au \24 couvent de Marke devant nonmees, seelees de nos seaus, 11 ki furent donees en l'an del Incarnation Nostre Segneur Jhesu Crist \25 mil deus cens soissante et quatre, el mois de decembre.