Téléchargement du document

Documents linguistiques galloromans
Corpus : (chHain)
Responsable du corpus : -
Édition de la charte : -

chHain110

1268, octobre.

Type de document: Vidimus: vente.

Objet: Transcription dans un vidimus confirmatif de Marguerite, comtesse de Flandre et de Hainaut, et de Guy, comte de Flandre et marquis de Namur, son fils, seigneur du fief, en date d'octobre 1268, de l'acte n^o 109.

Auteur: Marguerite, comtesse de Flandre et de Hainaut, et Guy, comte de Flandre et marquis de Namur, son fils.

Sceau: Marguerite, comtesse de Flandre et de Hainaut, et Guy, comte de Flandre et marquis de Namur, son fils.

Support: Parchemin jadis scellé de deux sceaux sur double queue.

Lieu de conservation: Archives de l'hôpital Notre-Dame à la Rose, à Lessines, 42.

Édition antérieure: Ruelle, 1984, Documents linguistiques de la Belgique romane. I. Hainaut, p. 133-137.

Verso: Confirmatio terre de Goÿ (XIII^e s.). — Confirmatio donationis terrarum de Goÿ (XIII^e s.).

1 Nous, Margerite, contesse de Flandres et de Haynau, et Guis, cuens de Flandres, marchis de \2 Namur, ses fix, 2 faisons à-savoir à tous chiaus ki ces letres veront et oront 3 que nous avons veues les le\3tres nostre chier ami et nostre feel Jehan, apelé signor d'Audenarde et signor de Rosoit, et Mahaut, se fe\4me, vidamesse d'Amiens, dame de Pinkegni, nient cancelees ne planees ne en aucune partie d'eles con\5chiies, en ceste forme.
4 Nous, Jehans, dis sires d'Audenarde et sires de Rosoit, et Mahaus, se feme, vida\6messe d'Amiens, dame de Pinkegni, 5 faisons à-savoir à tous chiaus ki ces letres veront et oront 6 que nous \7 avons vendu par bon et loial vendage à nos chiers amis les freres et les sereurs del hospital de Lessines \8 7 dou fief que je, Jehans devant dis, tieng de me tres chiere dame Margerite, contesse de Flandres et de Hay\9nau, cinquante livrees de terre à-paresis por cinc cens livres de paresis que il nous ont païes en apparel\10lie mounoie, 8 les queles cinquante livrees de terre nous leur avons assené seur trente et trois boniers de \11 terre ahanable par prisie de bones gens en no vile de Goÿ, si com cinc boniers et demi en deus pieces el \12 liu qu'on dist au Caisneel; au pire d'Acrene, sis jorneus; à Eskiens, cinc boniers et demi; à Ruemont, deus bo\13niers; à Sore Terre, set jorneus; à Blegiercamp, trois boniers; en Aliaucamp, quatre boniers; en Aliaubruec, \14 trois jorneus; au Stocoit, à-le fosse le Flamenc, trois boniers; à Sur-Triech, sis jorneus; et le remanant \15 à Sohierpreit, el liu qu'on apele Flartenbus. 9 Et cest vendage nous l'avons fait en tele maniere que \16 nous u nos oirs poons racater le terre devant dite de cinc cens livres de-paresis dedens le fin de \17 douse ans, aprés les fruis recuellus, en quele anee que li racas soit fais, en tele maniere que, se nous ceste terre \18 devant dite racatons si com dit est, ele revenra au fief que nous tenons de nostre tres chiere dame Mar\19gerite, contesse de Flandres et de Haynau, si com_me ele i apartint devant. 10 Et, se nous ensi lassons cour\20re cest markié que nous u nos oirs ne racatons le tere devant dite dedens le fin de douse ans ensi \21 com dit est, nous ne le poons de adont en avant jamais racater, ains demorra le tere devant dite perpe\22tuelment et iretaulement al hospital devant dit et le tenra chis hospitaus frankement et en ire\23tage, sauf ce que nous et nos oirs i retenons à tous jours le haute justice. 11 Et, s'il avenoit que nous u nos \24 oirs racatissons cele tere devant dite ensi com dit est, tous les preus que li hospitaus devant dis en \25 aroit pris et levé nous les donons pour Diu et en pure aumosne et par le plus grant devotion que nous \26 poons as povres del hospital devant dit sans amenrir leur cinc cens livres de paresis devant nom\27més. 12 Cest markié ensi comme il est chi devant devisés nous l'avons fianchié à tenir et Ernous, nos ains \28 nés fix, ausi et à-porter loial warandie. 13 Et si prions à noble dame et no tres chiere dame Margerite, \29 contesse de Flandres et de Haynau, et à nostre chier signor Guion, conte de Flandres et marchis de \30 Namur, sen fil, que il le tere devant dite nous laissent metre en iretage à oés l'ospital devant dit ensi \31 com dit est et que il cest markié greent, loent et conferment et constraignent nous et nos oirs au \32 tenir, comme signeur de le tere, se nous u nostre oir en aliens encontre. 14 El tesmongnage de le \33 quele chose nous avons fait ces presentes letres saeler de nos seaus, 15 ki furent faites en l'an del In\34carnation Nostre Signor mil .CC. et sissante wit, el mois de octembre.
16 Et nous, Margerite, contesse \35 de Flandres et de Haynau, et Guis, cuens de Flandres et marchis de Namur, ses fix, devant dit, à-la requeste \36 Jehan, apelé signor d'Audenarde et signor de Rosoit, et Mahaut, sa feme, vidamesse d'Amiens, dame de Pinkegni, \37 metons nostre otroi à ce que ces cinquante livrees de tere ki moevent de nostre fief de Flandres soient mises \38 en iretage si comme il est contenu es letres Jehan et Mahaut devant dis, 17 et le vendage k'il en ont fait al hospital \39 de Lessines nous loons, greons et confermons et ferons tenir comme signeur de le terre. 18 El tesmongnage \40 de le quele chose nous avons ces presentes letres fait saeler de nos seaus, 19 ki furent faites en l'an del Incar\41nation Nostre Signor mil .CC. et sissante wit, el mois de octembre.