Téléchargement du document

Documents linguistiques galloromans
Corpus : (chHain)
Responsable du corpus : -
Édition de la charte : -

chHain103

1267, août.

Type de document: Charte: vente.

Objet: Vente par Evrart d'Auby, chevalier, à Jacques de Warnaffe de quatre bonniers et un quartier de terre gisant à Chercq et nets de toute obligation sauf de la dîme ecclésiastique et d'un cens, dû au seigneur d'Ere, de quatre deniers de Laon par bonnier.

Auteur: Non annoncé.

Disposant: Evrart d'Auby, chevalier.

Bénéficiaire: Jacques de Warnaffe.

Autres Acteurs: Acte passé devant le seigneur d'Ere et les échevins de Chercq.

Support: Parchemin. Au bord inférieur, la moitié supérieure de la devise «CYROGRAPHVM».

Lieu de conservation: Archives de l'évêché de Tournai (cure de Chercq, I, 34).

Édition antérieure: Ruelle, 1984, Documents linguistiques de la Belgique romane. I. Hainaut, p. 125-126.

Verso: C'est Jakemon de Warnave (XIII^e s.).

1 Sacent tout cil ki cest escrit veront et-oront 2 ke me sire Evrars d'Aubi, chevaliers, a-vendut, werpit et clamet \2 quitte à-tous jours hiretaulement 3 à Jakemon de Warnave 4 .iiij. bouniers et .j. quartier de tiere, \3 pau plus pau mains, à disme Dieu, et par mi .iiij. lonisiens de cens cescun bounier c'on en-doit au segneur \4 d'Ere à-le Saint Remi, de le quele tiere .iij. boniers et-uns quartiers et .xxviij. verghes gisent en \5 .ij. pieces devant le Court de Warnave, et-li remanans gist desous Saint Andriu, sour les prés, s'est \6 à-partir encontre Saint Nicolai. 5 Cest hiretage devant nomet a me sire Evrars d'Aubi en cou\7vent à aquiter tout quite, par mi le disme Dieu et le cens devant dit, à Jakemon de Warnave jus\8ke al assens des eskievins de Cerc. 6 À cest werp et-à-toutes couvenences fu me sire Gilles d'Ere \9 come sires et-s'i-furent come eskievin de Cerc Watiers li Porkiers, Andrius de Cerc, Jehans \10 li Rikes, Stievenes de Froimont, Paiiens de le Ture, Pieres dou Celier et Sohiers de sour le-Pont. \11 7 Et disent cist eskievin par soumonse de segneur ke me sire Evrars d'Aubi estoit bien des_hire\12tés et est del hiretage devant dit par loi, et Jakemes de Warnave bien aïretés et-à loi. 8 Et si fian\13ça et jura me sire Evrars devant dis en le main le segneur ke jamais ne querra ne ne fera \14 querre, par lui ne par autrui, art ne engien, cause, matere, occoison ne cose nule en nule ma\15niere, par coi Jakemes de Warnave viegne à destourbier ne à damage de .iiij. d. ne de nient \16 del hiretage devant dit, dont il est bien aïretés par loi. 9 Et si se tiunt me sire Evrars d'Aubi \17 a paiiet par devant mon segneur d'Ere et par devant ses eskievins, tout plainement, en boi\18ne mounoie loial et bien contee, de Jakemon de Warnave, et-le quita de tout le paiement. \19 10 Et por çou ke ce soit ferme cose et-estaule, si en est cyrographes fais en .ij. parties, del quel \20 Jakemes de Warnave warde l'une partie et li eskievin devant nomet wardent l'autre partie. \21 11 Ce fu fait l'an del Incarnation .MCC. et .LXVII., el mois d'aoust.