Téléchargement du document

Documents linguistiques galloromans
Corpus : (chDoubs)
Responsable du corpus : Martin Glessgen
Édition de la charte : -

chDoubs280

1268, 6 octobre.

Type de document: Charte: demande.

Objet: Demande d'Hugues de Montferrand, seigneur de Thoraise, à Othon de Bourgogne, de se porter garant vis à vis de Pierre de Montferrand, vicomte de Besançon, pour les biens situés à Mons, Grandfontaine et au bois de Verney, que celui-ci lui a vendus pour mille livres de viennois.

Auteur: Hugues de Montferrand, seigneur de Thoraise.

Sceau: Hugues de Montferrand, seigneur de Thoraise et cour de Besançon.

Bénéficiaire: Othon de Bourgogne.

Support: Parchemin jadis scellé sur double queue de deux sceaux, 300x255.

Lieu de conservation: AD Doubs, BTC 453-22.

Édition antérieure: J. Gauthier, 1908, Cartulaire des comtes de Bourgogne, n^o CCXXVI, p. 194.

Verso: Letres de l'obligation que li contes de Borgogne fit en la main Perrin signor de Montferrant de Hugue de Montferrant.

1 Je, Hugues de Montferrant, sires de Thoraise, 2 fais savoir à toz ces qui verront et orrunt ces presentes lettes 3 que je ai proié et requis Othe de Borgoigne, mon soignor, \2 que il s'obliioit et anloit en la main Perrin, soignor de Montferrant et vyconte de Besançon, mon nevol, de randre audit Perrin et de faire ravoir totes les \3 choses que je ai achetees doudit Perrin por mil lb de viannois, c'est à-savoir Grantfontaine, Monz et le bois de Verney ensinc cum il s'estant et cumporte \4 par la division des bones ^[1] que mises i sunt et establies, et le Royez et toz les molins que cil Perrins i avoit et avoir pooit et devoit, et le fyé de Denne\5marie et quant que il i avoit et pooit aver et devoit, et totes les apandises et les apartenances de ces luex, et toz les droiz, les raisons et les \6 soignories desdiz luex, et tot quant que il en ces luex et en ces choses desus dites totes et une chascune avoit et pooit avoir et devoit par quel\7que droit et par quelque raison que ce fust, en totes manieres et en toz profeyz, en fyez, en soignories, en jostises, en hommes, en tailles, \8 en rantes, en yssues, en forz, en molins, en terres, en prez, en bois, en byez, en eaus, en vygnes, en censes et en totes autres choses quex\9que eles soient et puissient estre sanz riens retenir. 4 Et com lidiz Othes, mes sires, à ma proiere et à ma requeste, se soit obligiez et \10 anloiez en la main audit Perrin de randre et de faire ravoir à celu Perrin totes les choses desuisdites, por mil. lb. de tel viannois cum je \11 li ai paiez, c'est asavoir en tel valoir cum il sunt au tans et au jor que ces letres sunt faites, se lidiz Perrins vuelt paier lesdites \12 mil. lb. à sa vie, se il en requiert ledit Othe à sa vie, ou les hoirs audit Othe, cuy il en a aussi obligiez, 5 je audit Othe mon soignor \13 ai promis, par mon sairemant et par leal stipulation et sollempnel que je ranrrai et ferai ce que il an a promis et anmplirai dou tot en \14 tot, et tot trainchiemant sanz riens falir, tot ansinc cum il l'a promis audit Perrin, et eisinc cum il est contenu es letres que lidiz Othes, \15 mes sires, a de ces convenances faites et baillies audit Perrin, saelees de som seel et dou seel de la cort de Besançon avec le seel l'ab\16bé de Saint Vincent de Besançon. 6 Et se aucuins dommaiges en avenoit audit Othe, mon soignor ou es suens, par occasiom de moy \17 ou des miens, je promet audit Othe, par mon sairemant, que je lui gererai et garderai de toz dommaiges; 7 et se, par occasiom de ce et \18 par mon deffaut en encorroit aucuyns dommaiges lidiz Othe ou li suen, je li restoreroie entieremant et sanz plaiz et sanz cause me\19noir, et des dommaiges que il en auroit encorruz, je croiroie luy ou les suens par simple parole sanz autre prove. 8 Et por totes ces \20 choses dessuis devisees et promises parfaire, tenir, garder et anmplir, obliiois ge et anlois audit Othe, moy et mes hoirs et totes mes cho\21ses quexque eles soient et en quelque luye que eles soient; et se je en deffailloie de riens, ou je en venoie encontre en aucune maniere, \22 je vuil et outroi et cunmant que li.. arcevesques de Besançon qui adonc sera ou ses.. officiaus m'escumenioit, et ma terre et mes hommes mete en antre\23dit. 9 En tesmoingnaige de laquel chose, je ai mis mon seel en ces letres, et i ai fait metre le seel de la cort de Besançon. 10 Et nos.. officiaus \24 de la cort de Besançon, à la requeste doudit Hugon, avons mis en ces letres le seel de nostre cort avec le suen seel. 11 Ce fu fait et doné \25 .II. Nones de oyctovre en l'an Nostre Soignor .M.CC. et .LXVIII.

Notes de transcription
^[1] Sic.