Téléchargement du document

Documents linguistiques galloromans
Corpus : (chDoubs)
Responsable du corpus : Martin Glessgen
Édition de la charte : -

chDoubs252

1266, 28 octobre.

Type de document: Charte: mise en gage.

Objet: Mise en gage par Philippe, seigneur de Mirebel, fils d'Hugues d'Antigny, comte de Vienne et seigneur de Pagny, et sa femme Agnès, fille d'Hugues, comte palatin de Bourgogne, et d'Alis, sa femme, d'Aumur et de Saint-Aubin, au comte et à la comtesse de Bourgogne, pour 3000 livres d'estevenants, avec l'accord du comte et de la comtesse de Vienne^[a].

Auteur: Philippe, seigneur de Mirebel, fils d'Hugues d'Antigny, comte de Vienne et seigneur de Pagny, et sa femme Agnès

Sceau: Philippe, seigneur de Mirebel, et Agnès, sa femme, fille de Hugues et d'Alis, compte palatins de Bourgogne.

Bénéficiaire: Hugues, comte palatin de Bourgogne, et Alis, sa femme.

Autres Acteurs: Hugues d'Antigny, comte de Vienne et seigneur de Pagny, et Alis, sa femme.

Support: Pachemin jadis scellé de trois sceaux sur double queue, dont il reste un, 275x162.

Lieu de conservation: AD Doubs, BTC 400-11.

Édition antérieure: J. Gauthier, 1908, Cartulaire des comtes de Bourgogne, n^o CCX, p. 182.

Verso: C'est la lettre de l'obligation faite au conte e Bourgogne de saint Aubin et de ses apertenances, et de toutes les choses qui appartenoient au mariaige de madame Agnés, fille dudit conte, laquele obligation fu faite pour monseigneur Philippe, qui fu fillz du conte de Vianne, mari de ladite Agnés. Fié de saint Abin. De la gagiere de Saint Albin et de Aumurs.

1 Je, Philippes, filz Hugue, conte de Vihanne et seignor de Paigné, qui suy sires de Mirebel, et je Agnés, fille au nouble baron Hugon, conte \2 palazim de Borgogne, sa fanme, qui somes fors de toute avoerie, et en pleim pooir d'ordener de noz chouses, 2 faisons savoir à touz cex qui verront \3 et orront ces presentes letres 3 que nos, por nostre grant besoing, avons mis en gaiges Saint Abbim et toutes les apertenances, et Amurs et toutes les apertenances, \4 et toutes les chouses qui apertienent au mariaige à ladite Agnel, 4 es mains nostre tres chier seignor et nostre pere Hugon, conte palazim de Borgogne et \5 à nostre tres chiere dame et nostre mere Alis, contesse palazine de Borgogne, come lor fié lige, 5 doquel je, Philippes, suy ja entrez en lor homaige, por tout faire \6 et por tout prendre. 6 Ce est asavoir, por trois mile livres de bons estevenans, lesqueles nos avons recehues en deniers nonbrez entierement, et sunt torné \7 en nostre proffit. 7 Et toutes unes, por ce que moins an soyons blasmez, voluns que l'om saiche que nos avons ceste chouse faite per le loux et per le consantement \8 nostre chier pere, ledit Hugon, conte de Vihanne et seignor de Paigney, et à nostre chiere mere Aalays, contesse de Vihanne, sa fanme. 8 Et nos, lidiz H., \9 cuens de Vihanne et sires de Paigné, et ladite Aalays, sa fanme, conoissuns biem que nos l'avons consenti et outroyé n'en aller n'an poons en contre, \10 ne davons, per noz sairemenz que nos an avons faiz corporelment, per nule achoison. 9 Et conoissuns bien oncor que il sunt fors de nostre avoerie. 10 Et \11 je, Agnés devantdite, di et conois et acordement consant que, se il avenoit chouse que lidiz Philippes, mes mariz, morist avant de moy, que \12 je, por ce que ceste chouse muet de mon herietaige et de mon mariaige, que je encontre ces chouses devant escriptes, ne toutes ensanble, ne chascune \13 por soy, ne puis aler, par moy ne par autruy, et à ce me suy je enloiié par mon sairement, que je an ay fait corporelment, mais m'an puis tenir, et doy, \14 audit H., conte de Vihanne et segnor de Paigné, mon chier segnor, et as ses hoirs, qui vers moy s'an est enloyez, por luy et por ses hoirs, de \15 rachater ladite gaigiere, ensi com il est contenuz as letres que je an ay de luy. 11 Et, por ce que ceste chouse soit ferme et plus estauble, avons \16 nos fait metre en ces presentes letres lo seal nostre chier pere Hugon, conte de Vihanne et segnor de Paigné, et lo seal Guillaume, segnor de \17 Pesmes, et je Philippes, i ay mis le mien, por ce que moins an puisse aler encontre. 12 Ce fu fait lo jor de la feste des apostres saint Simon \18 et saint Jude, l'an de l'incarnatiun Nostre Segnor Jhesu Crist corrant per mil .CC. et sexante et sis, ou mois d'octaubre.

Notes de fiche
^[a] cf. 1b400 s27, où cependant il n'est question que de 2000 livres.