Téléchargement du document

Documents linguistiques galloromans
Corpus : (chDoubs)
Responsable du corpus : Martin Glessgen
Édition de la charte : -

chDoubs232

1265, novembre.

Type de document: Charte: reprise en fief.

Objet: Reprise en fief lige par Philippe, fils d'Hugues d'Antigny, comte de Vienne et seigneur de Pagny, d'Hugues comte palatin de Bourgogne, et d'Alis, sa femme, de Saint-Aubin et Aumur, dot de sa femme Agnès, fille du comte et de la comtesse de Bourgogne. Il emprunte sur ces villes 2000 livres d'estevenants, qu'il donne à son père, Hugues d'Antigny, comte de Vienne et seigneur de Pagny. Suivie par une reconnaissance faite par Hugues d'Antigny de les avoir reçues, et engagement, sur ses rentes du puits de Loyons, à les rembourser au comte et à la comtesse de Bourgogne, ou à leurs héritiers, si Philippe ou Agnès mouraient sans héritier avant lui. Si Philippe survit à Agnès et à ses enfants, les 2000 livres devront aussi être remboursées au comte et à la comtesse de Bourgogne. Suivie par l'accord donné par Agnès à ces dispositions.

Auteur: Philippe, fils d'Hugues d'Antigny, comte de Vienne et seigneur de Pagny.

Sceau: Hugues d'Antigny, pour lui, pour Agnès et pour Philippe, et Amé [de Montbéliard], seigneur de Montfaucon et Guillaume, seigneur de Pesmes.

Bénéficiaire: Hugues comte palatin de Bourgogne, et Alis, sa femme.

Autres Acteurs: Agnès, femme de Philippe et fille de Hugues et Alis, comte et comtesse palatins de Bourgogne, Hugues d'Antigny, comte de Vienne et seigneur de Pagny, père de Philippe.

Support: Parchemin jadis scellé de trois sceaux sur double queue, il reste deux sceaux, 355x202.

Lieu de conservation: AD Doubs, BTC 400-10.

Édition antérieure: J. Gauthier, 1908, Cartulaire des comtes de Bourgogne, n^o CXCVI, p. 169.

Verso: Des fiez du segnor de Paigné, et de Saint Aubin et de Haumur.

1 Je, Phylippes, filz au noble baron Huguon d'Anteygné, conte de Vyanne et signor de Paygné, qui sui fuer de mainbornie et en mon plain pooir, 2 faiz savoir à touz ceus qui ces presantes letres oirront et verront 3 que je ai repris lyegement Saint \2 Aubyn et Haumur, et toutes les apandises, de mon tres chier signor Huguon, conte palatin de Borgogne et de ma tres chiere dame Alys, contesse palatine de Borgogne, sa fenme, 4 lesquelles choses je doi avoir et tenir por la raison de ce que elles me sont do\3nees en mariaige por Agnel, ma fenme, lour fille, et de lour les tieng et doi tenir en fiés et en chaisement lyege. 5 Aprés faiz encor à savoir à touz que je, por lou tres grant besoing mon tres chier pere, loudit Huguon, conte de Vyanne et signor de \4 Paygné, aprés ce que lidiz homaiges fu faiz, 6 ai empronté doudit Huguon, conte palatin de Borgogne et de ladite Alys, contesse palatine de Borgogne doues mile lb. de bons estevenains sor Saint Aubyn et sor Haumur, et sor toutes les apandises, 7 lesquelles choses toutes \5 je ai en lour mains enloyés, et delivrees lour ai, et avoir et tenir les doient, et touz les pronz et toutes les yssues lever et avoir come signor, et lour doient estre, jusque tant que les dites doues mile lb. lour soient rendues entierement, 8 lesquelles doues \6 mile lb. je ai de lour reçeues en deniers nombrez entierement, et baillies et delivrees les ai entierement à mon tres chier pere Huguon, conte de Vyanne et signor de Paygné davant dit, por son grant besoing ensi con desus est dit, et tornees sont en \7 son profit.
9 Et nos Hugues d'Anteygné, cuens de Vyanne et sires de Paygné davant-diz, disons, conoissons et tesmoingnons que nos avons aües et reçeues les dites doues mile lb. en deniers nombrez de Phylippe, nostre chier fil, por nostre grant besoing, \8 et tesmoingnons, loons et acordons entierement l'engaigement et l'enliance davant-diz. 10 Aprés, por ce que la dite gaigiere est del mariaige Agnel, la fenme nostre fil, et por ce que, se nostre davant-diz filz Ph. moroit, la chose toute devroit retorner à sa fen\9me et à ses anfanz, ou à sa fenme, se sainz enfanz estoit, ou audit conte et à ladite contesse de Borgogne, ou à lour heirs, se il avenoit chose que ladite Agnelx, la fenme nostre fil Ph., et sui anfant morissent. 11 Et por ce que ne seroit pas raisons \10 que por teil meschief, dont Dex nos gart, lidiz cuens et ladite contesse de Borgogne perdissent lesdites doues mile lb. que il ont presté à nostre fil Ph., por nostre grant besoing, ensi com desus est escript, nos disons que se chose avenoit que notre \11 filz, Ph. davant-diz, morist avant que lesdites doues mile lb. fuissent paiés, nos seriens tenu de rendre lesdites doues mile lb. au dit conte palatin de Borgogne et à ladite contesse, ou à lour heirs, entierement. 12 Et se tout demoroit lidiz \12 Ph. nostre filz vif, et ladite Agnelx et sui anfant moroient, nos seriens tenu de rendre les dites doues mile lb. au dit conte et à ladite contesse de Borgogne, ou à lour heirs, 13 por lesquelx choses nos en enloions en lour mains toute \13 la rente que nos avons ne devons avoir el païs et as chaudieres de Loyons, et les i assennons, et volons et comandons et otroyons que il puissent tout tenir et avoir entierement, jusque tant que nos lour aiens entierement paié \14 lesdites doues mile lb., se paiés n'avoient esté avant que telx meschiés, com desus est dit, dont Dex nos gart par sa pitié, fust avenuz.
14 Et je, Agnelx, fenme au dit Ph., toutes ces choses davant escriptes, ensamble et chascune par soi, \15 lou, vuel, otroi et acort et conois.
15 Aprés, nos Hugues, davant-diz cuens de Vyanne et sires de Paygné, je Ph. davant-diz, ses filz, et je Agnelx, fenme audit Ph., avons promis et prometons, par noz sairemenz que nos avons fait \16 corporeelment, que nos toutes ces choses ci davant escriptes, et chascune por soi, tenrons fermement, et que nos encontre n'irons ne par nos ne par autre et, par loudit sairement renunçons à toute meniere de droit escript et usé, \17 en teil meniere que valoir n'en aidier ne nos puisse, ne doie, encontre chose que ci davant soit escripte. 16 Aprés, por ce que toutes les choses ci davant escriptes et ordenees soient tenues fermement, nos avons fait ces presan\18tes letres saeleer de plusors seels, ce est asavoir dou nostre seel Huguon d'Anteygné, conte de Vyanne et signor de Paygné, lou quel nos i avons mis por nos et à la requeste et as proieres de nostre fil Ph. et de Agnel, sa fenme, dou se\19el Amee, signor de Montfaucon et dou seel Guillaume, signor de Pesmes. 17 Et nos, Amees, sires de Montfaucon et nos, Guillaumes sires de Pesmes ci davant dit, à la requeste et as proieres as davant-diz Huguon, conte de Vyanne \20 et signor de Paygné, de Ph., son fil, et de Agnel, la fenme Ph., avons mis noz seels en ces presantes letres, 18 que furent faites l'an de l'incarnation Nostre Signor mil .CC. et sexante cync, ou mois de novembre.