Téléchargement du document

Documents linguistiques galloromans
Corpus : (chDoubs)
Responsable du corpus : Martin Glessgen
Édition de la charte : -

chDoubs222

1265, juin ou juillet.

Type de document: Charte: quittance.

Objet: Quittance donnée par Bertin d'Espernay et sa femme Marguerite, veuve de Guillaume de Chamblains, à Hugues, comte palatin de Bourgogne, et Alis, sa femme, pour 600 livres de viennois, prêtées à partir d'argent fourni par Guillaume de Chamblains, par Revelyn et Gauvain, prêteurs de Seurre, à Hugues, seigneur de Neublans, pour lesquelles le comte et la comtesse étaient garants, et qu'ils ont remboursées.

Auteur: Bertin d'Espernay et sa femme Marguerite, veuve de Guillaume de Chamblain.

Sceau: [Guillaume], archevêque de Besançon.

Bénéficiaire: Hugues, comte palatin de Bourgogne, et Alis, sa femme.

Autres Acteurs: Guillaume de Chamblains; Hugues, seigneur de Neublans.

Support: Parchemin jadis scellé sur double queue, 273x215.

Lieu de conservation: AD Doubs, BTC 65-9.

1 Nos, Bertyns d'Espernay, chivaliers, et nos Mergerite, sa fome, qui fusmes ça en arriers fome mon signor Guillaume de Chanblains, qui moz est, \2 2 façons savoir à toz çaus qui orront et verront ces presantes letres 3 que, cum nos doassiens que nos aviens droit et raison vers Huge, signor de Neblans, de \3 sex cenz lb. de vyennois que il davoit Revelyn et Gauven, freres, citaïns d'Aist, mercheanz qui soloent tenir tauble por prester à Sahorre et vers les nobles \4 Hugue, palatin conte de Borgoigne et Alis, contasse palatine de Borgoigne, sa fome, por raison de ce que il estoent enloié plage et rendeor, por ledit signor \5 de Neblans, desdites sex cenz lb. as mains as diz Revelyn et Gauveyn, freres, si com nos disiens. 4 Et por ce que lidiz Revelyns et lidiz Gauveyns \6 frere, lesdites sex cenz lb. nos avoient assené et desvesti s'en estoient, et envesti nos en avoient devant ledit conte et ladite contesse, et comandé \7 lor avoient que l'on les nos paiast, si com nos disiens, per encoison de ce que lesdites sex cenz lb. estoient aües pretees audit signor de Neblans des \8 deniers mon signor Guillame de Chanblains, nostre davantier, qui morz est, ainsi com nos disiens, per les mains as diz Revelyn et Gauveyn frere, \9 5 nos disons et conoissons et voirs est que lidiz cuens et ladite contasse ont lesdites sex cenz lb. paiés en denniers contanz asdiz Revelyn \10 et Gauveyn freres, par nostre acort, par nostre gré, par nostre comandement et en non de nos, et nos en sumes tenu et tenens por paié entierement \11 de quant que nos i poons demander, ou davons, per nos ne per autrui, ne jamais n'en poons ne davons riens demander, per nos ne per autrui as\12diz Huge, conte palatin de Borgoigne, et Alis, contasse palatine de Borgoigne, ja soit ce que nos disons et reconoissons que nos, ni aumes onques ne \13 n'avons droit ne raison, et se point en i aumes onques ou avons, nos les en quitons et absoillons entierement, et por nos et por les noz, \14 ne jamais ne lor en poons ne davons riens demander, ne nos ne li nostre, per nos ne per autrui, et ne volons que latres, ou raisons, ou \15 exceptions queles que elles soient ne nos i poissent jemais aidier ne valoir, ne lor grever, ne traire avant ne les porriens ne dauriens \16 et avons juré sor sainte evvangile personeelment que nos jamais, per nos ne per autrui riens ne reclamerons, ne farons reclamer por raison \17 de ces sex cenz lb. devant dites, et que nos tenrons totes les choses devant dites. 6 Et por ce que ceste chose soit ferme et estauble à toz jors \18 mes, en tesmoignage de verté, nos avons fait à metre par nos requestes en ces presentes letres le seel à honorable (par) Willaume par la grace \19 de Deu arcevasque de Besançon. 7 Ces latres furent faites en l'an de l'incarnation Nostre Signor qui corroit per mil et .CC. et sexante cinc, \20 ou mois de joyngnet.