Téléchargement du document

fichier xml fichier pdf

Documents linguistiques galloromans
Corpus : (chDoubs)
Responsable du corpus : Martin Glessgen
Édition de la charte : -

chDoubs173b

1293, 29 décembre.

Type de document: Vidimus: donation en fief.

Objet: Vidimus de l'acte précédent (chDoubs173a) par Luc, curé de Poligny et Jean dit Borne, prêtre de Bracon.

Auteur: Luc, curé de Poligny et Jean dit Borne, prêtre de Bracon.

Sceau: Luc, curé de Poligny et Jean dit Borne, prêtre de Bracon.

1 Nos, Luques, curé de Poloigney, et Jeham dit Borne, de Bracom, prestre, 2 façoms savoir à touz \2 3 que nos avons vehues unes latres sainnes et entieres, qui ne sunt reses ne corrumpues en acune partie \3 don la forme est tele:
4 Nos, Jehams, coens de Bourgoigne et sires de Salins, 5 façoms savoir \4 à touz cex qui verront ces presentes letres 6 que nos avons doné et outroié, en nostre desraianne volunté, \5 à noble barom Huguon, comthe de Bourgoigne palatain, nostre fil, en sa partie que de nos doit \6 avoir de noz biens, 7 le fié que Estainnes, sires d'Oyselerc, nostre freres, tien et doit tenir de nos, \7 8 en tel maniere que nos, ne hoirs que nos aioms, autre que li hoirs à dit Huguon, ne puissent \8 reclamer riens ou dit fié, se ensi n'estoit, que Dex ne vuille, que lidiz Hugues moroit \9 senz hoirs de son cors. 9 Et est asavoir que nos avons rapelé et rapeloms quelque dom et \10 quelque outroi que nos avons fait doudit fié à mon seignour Jeham, nostre fil que \11 nos avons de la conthasse Yssabel, nostre sescomde fanme, 10 et voloms et comandoms que, apres \12 nos, lidiz sires d'Oyselerc, ou sui hoirs, entroient en l'omaige dou dit Huguon, ou de ses \13 hoirs, dou devant dit fié. 11 En tesmoignage de laquel chose, nos avons mix nostre seal en cex \14 presentes letres. 12 Ce fu fait l'an Nostre Seignour .M. et .CC. et sexante dous, ou mois de mai.
13 \15 En tesmoignage de nostre visiom, nos avons mix nostre seal en cex latres, 14 donnees le mardi apres la nativité Nostre \16 Seignour, l'an mil .CC. nonante trois.