Téléchargement du document

Documents linguistiques galloromans
Corpus : chOccAnc3 (chOccAnc3)
Responsable du corpus : Martin Glessgen
Édition de la charte : C. Brunel

chOccAnc300

1196, 5-26 avril.

Type de document: Charte: vente.

Objet: Vente par Peire Malpel et les siens, à Gautier de Lavaur, de ce qu'il a de Puech-Argilier jusqu'à Villemur et du Girou jusqu'à l'Agoût.

Auteur: Peire Malpel et les siens.

Bénéficiaire: Gautier de Lavaur.

Support: Partie supérieure d'une charte-partie par ABC.

Lieu de conservation: Archives nationales, J 323 (Toulouse XIV), n° 55.

Édition antérieure: C. Brunel, Les plus anciennes chartes en langue provençale (Paris, 1926), p. 296-298. Indiqué par A. Teulet, Layettes du Trésor des chartes, t. I (Paris, 1863), p. 188, n° 447. Fac-similés de l'École des chartes, ancien fonds, n° 136.

1 Conoguda causa sia a totz homes que aquesta carta veirau ni audirau legir 2 qu'en Peire Malpels essa moiller na Guillema e lor effant, letz assaber Peire e \2 Guirautz e Ramonz, tog essems, senes retenement que no i feiro de neguna re, 3 vendero et assolsero e liurero e desamparero a'n Gauter de Lavaur \3 et asso ordeng, 4 tot aco que avio ni aver devio, ni hom ni femena de lor, de Pog Arziler tro a Vilamur e de Giro tro ad Agot. 5 Tot quant dinz aquestz ter\4minis predigz avio ni aver devio, ni hom de lor, tot li o an vendut et assout e liurat e desamparat, letz assaber los castellz e las forzas que dinz aquestz pre\5digz terminis avian ni aver devian, e las terras hermas e condreitas, els boscs e las bartas e las rocas els plas e las aigas, els homes e las femenas \6 e lors tenenzas, on que li homi ni las femenas sian que d'aquestas predictas honors so ni esser ne devo, on quessio, els cesses els usatges els espleitius e las seino\7rias els feus dels cavallers e dels autres homes, e totz los demanz els devendementz que a las predictas honors s'aperteno. 6 Tot quant dinz aquestz terminis \8 predigz avian ni aver devian per lor ni per autrui, tot o an vendut e liurat e desamparat, senes retenement que no i an fag de neguna re, a'n Gauter predig \9 et asso ordeng, et au ne avutz de lui .iii. milia e .cccxl. sol. melgoires, dels quals se tengro be per pagag d'en Gauter. 7 Esse las predictas causas re valian mais \10 oltrals predigz .iii. milia e .cccxl. sol., tota aquella maisvalenza donero ad escient a'n Gauter predig et asso ordeng. 8 Esse na Guillema predicta nuill dreg ni \11 nuilla rado avia ni aver devia ab que pogues venir encontra la predicta venda, tot aquel dreg et aquella rado se tolc ad escient, que jamais valer noill \12 pogues, e donec lo a'n Gauter et asso ordeng. 9 E na Guillema predicta diss que la predicta venda fadia per som bo saber e per sa bona voluntat. 10 Essi na Guillema ni sei efant \13 predig re e las predictas honors avio empenorat ni laudat aver ad home, devo esser guireng d'aco a'n Gauter et asso ordeng. 11 Essi'n Peire Malpels re avia \14 empegnat ni aver laudat ad home el gadang que avia fag d'en Bernat Ponz d'Auriac que es e la predicta venda, ni el gadang que avia fag d'en Guillem de \15 Jonqueiras que es e la predicta venda, deu n'esser guirenz a'n Gauter et asso ordeng. 12 E las cartas que n'avia Peire Malpels d'aquestz gadangz predigz, liurec las a'n \16 Gauter predig e mes lo'n en tenedo ab aquellas cartas. 13 E na Guillema essei effant predig liurero a'n Gauter las cartas de las honors quesso de la predicta venda \17 et ab aquellas cartas mesol ne en tenedo. 14 E'n Peire Malpels e na Guillema covengro a'n Gauter que se a lors fillas avio re laudat ni autorgat e las predic\18tas honors, que o farian sout a'n Gauter, e covengroill ne guirentia de lors fillas e de tot home e de tota femena que per las fillas re i demandess ni contrast \19 i fedes a'n Gauter et asso ordeng. 15 E'n Peire Malpels e na Guillema e lor effant predig covengro a'n Gauter que en re encontra la predicta venda no vengan \20 ni encontra las predictas covenenzas no vengan, eill ni hom ni femena per lor geng ni per lor cosseill, e pleviroill o per fe e jureroill o sober s. evangelis. 16 Essia cau\21sa conoguda que totz los gadangz els conquistz qu'en Peire Malpels avia faitz dinz aquestz predigz terminis, aissi quo es de Pog Arziler tro a Vilamur e de Giro tro \22 ad Agot, totz los li a vendutz en aquesta predicta venda a'n Gauter predig et asso ordeng. 17 Facta carta mense aprili, feria .vi^a., anno Christi incarnationis .M^o.C^o.XC^o.VI^o., regnan\23te Philippo rege Francorum, Raimundo comite Tolosano, Fulcranno episcopo. 18 Hujus rei testes sunt Guilabert de Pog Laurenz, Guillabert de Foissac, Guillem Matfre, Ponz de Lobenx, Bernat de \24 Mont Auquer, Peire de Castlar, Gauter Lusz, Guillem Saisset, Rigaut Saisset, Bernat Ponz, Peire Gag, Oalric de l'Anglada, Bertran Malamosca, Bernat Malamosca, \25 Bernat Ebri, Peire d'Airos, Guillem de Juill, Marti de la Bastida et Guillelmus scriba qui hanc cartam scripsit.