Téléchargement du document

Documents linguistiques galloromans
Corpus : chartes de Meurthe-et-Moselle (chMM)
Responsable du corpus : Martin-D. Glessgen
Édition de la charte : Martin-D. Glessgen / Michel Arnold (révision: D. Kihaï)

ChMM085

1251, septembre

Type de document: charte: association

Objet: Association faite entre Pierre abbé de Saint-Mihiel et son couvent, et Thiébaut [II] comte de Bar au sujet des marchés et des foires de Saint-Mihiel et Condé; le comte de Bar, l'abbé et le couvent se partageront la moitié des revenus tandis que le couvent se réserve certains droits.

Auteur: Pierre abbé de Saint-Mihiel et son couvent

Sceau: auteurs; Roger évêque de Toul et Jean évêque de Verdun

Bénéficiaire: Pierre abbé de Saint-Mihiel et son couvent, et Thiébaut [II] comte de Bar

Autres Acteurs: sergent de Saint-Mihiel; maire de Saint-Mihiel et de Condé

Rédacteur: scriptorium épiscopal de Verdun [lang; rdexc: EpToul, AbbSMihiel (lang, pal)]

Support: parchemin jadis scellé de quatre sceaux sur double queue, sur lacs de soie

Lieu de conservation: AD MM B 910, n^o 2, layette Saint-Mihiel I

Édition antérieure: Scott, XI

Verso: Accompagnement fait par l'abbe et convent de Saint Mihiel avec Thiebault conte de Bar (XIV^e s.)

1 Nous, Pierres,· par la volentei de Deu abbes et tous li couvens de Saint Mihiel, 2 faisons conoissant à tous ciaus qui ces lettres verront et orront 3 que nos tuit, par commun \2 assent, por le prou de nostre eglise, avommes acompagnié le noble baron Thiebaut, conte de Bar,· à tous nos marchiés et à toutes nos foires de Saint-Mihiel et de Condei et à tous nos \3 bois ou que il soient dedens sa terre et dedens sa seignorie,· 4 en tel maniere que de toutes les valors et de toutes les acreues, en quelque maniere que elles soient, doiens nos avoir la mottié et \4 il l'autre,· 5 sauf lou ban et la justice des devant-dites villes et de toute nostre terre que nous retenons entierement, ainsi comme nous l'aviens devant tenu en pais. 6 Et sauf le chamage de Saint Mi\5hiel que nous avons autresi retenu· 7 et sauf ce que nos li devant-dis couvens devons panrre chascun an on marchié de Saint-Mihiel dou commun set livres de fors por les estaus et autres rentes que nous \6 i aviens devant;· 8 et li chamberlains nostre abbei seix muis et demi de fromment et autretant de soile chascun an à toz jors autresi dou commun; 9 et doit panrre cest devant-dit bleif li chamberlains \7 on sesterage del marchié de Saint-Mihiel por ce que li sesterages soloit devant tous estre suens en-fié.· 10 Et est à savoir que li devan-dis cuens doit à ses coustanges conduire et garder en bone \8 foi les marchiés et les foires devant-dis· 11 et des amendes de force faite dedens les conduis des marchiés et des foires dis devons nous avoir la mottié et il l'autre; 12 et nos \9 et il ensamble devons metre prodommes jurieis qui receveront les amendes et toutes les valors des marchiés et des foires et venderont et nos en renderont par sairement \10 la moitié et lui l'autre. 13 Et li devant-dis cuens, ne sui hoir, ne pueent faire marchié ne foire à dous leues pres des devant-dites villes, par quoi elles, ne li marchié, ne les foires \11 devant-dites fussent grevees ne empiriees; 14 et les hales des devant-dis marchiés doient estre assises dedens nostre ban et nostre justice et nos devons mettre au faire et au retenir \12 des hales la moitié et li cuems l'autre. 15 De nos bois sunt les couvenances teiles que nos et li cuens i devons metre communement forestiers et nos devons la mottié \13 paier des louyers et il l'autre, et si devons avoir la mottié des amendes et il l'autre, et toute la force doit li cuens deffaire au suen à la bone foi. 16 Et est à savoir que nos avons \14 retenu et retenons en tous nos bois entierement notre usuaire por nos et por toutes nos prioreis, et por toutes nos granges, et por tous nos molins, et por tous nos edifices \15 ou que il soient, por ardoir, por marteneir an quelque maniere que ce soit et nostre chacerie et le paissons por toutes les bestes de nos norissons; 17 et nos et li cuens devons ven\16dre à la bone foi par commun assent le sorpoil des bois et la glans se point en i sorcressoit à vendre outre nostre paisson. 18 Et se nos et il nos descordiens del vendre se proudomme esgar\17doient par sairement que li devant-dis bois et li glans fussent en bon point de vendre rasnablement, il couvenrroit que nos et il nos acordissiens à la vendue et nos averiens la \18 moitié del vendage et il l'autre; 19 et se il avenoit par aventure que on traissist point de nos bois à champ, li garbages et li dismes en seront nostres entierement por la raison dou \19 treffons qui nostres est; 20 et de ces bois ne puet point doner li-uns de nos sens l'autre. 21 Et est à savoir que tous les vendages des marchiés et des foires, et des bois, et de toutes les \20 amendes devons nos panrre à chascun paiement et à chascun termine nostre mottié devant et li cuens la sone aprés; 22 et est ausi à savoir que li devan-dis cuens et su hoir qui \21 venrront aprés lui à la contei de Bar doient toutes ces devant-dites choses adés tenir an lor mains, ne il ne sui hoir ne puent lor mottié ne le pou ne le grant doner, ne enga\22gier ne vendre, ne autrui fiever, ne metre en autrui main, ne n'en puent faire aumosne fors qu'a nostre eglise; 23 et est à savoir ausi que tuit nostre sergent fievei par heritage doient \23 estre franc à tous jors d'oir en hoir. 24 Et nostre maior de Saint Mihiel et de Condei doient faire avoir au conte ses despens quant il ira en devant-dites viles, en teil maniere que se il ne \24 lor faisoit paier ce que il li averoient fait avoir dedans quarante jors puis que il li averoient requis, li maior ne li-feroient plus avoir tant que cil averoient entierement lor paie\25ment; 25 et se li devant-dis cuens ou ses gens mesprenoient envers nos de toutes ces choses devan-dites, li cuens le nos feroit deffaire dedens quarante jois arrés nostre requeste à la bone foi \26 toutes ces couvenances devan-dites ainsi comme ceste chartre le devise at li devant-dis cuens jurei à tenir entierement à tous jors; 26 et aprés son deces sui hoir ainsi com il venrront aprés lui d'oir \27 en hoir à la contei de Bar doient il ^[1] autresi jurer que il garderont toutes ces devant-dites couvenances ainsi comme ceste chartre le devise et nos en doient doner lor lettres seelees de lor sees. \28 27 Et se il sui hoir ne voloient tenir et jurer et seeler totes ces choses devat-dites ainsi com elles sunt devisees, nos tenrriens tous les chateis de toutes ces choses devant-dites jusques à tant \29 que il les ^[2] nos averoiet jurees à tenir et seelees de lor sees; 28 et est ausi à savoir que nos ne poons rapeleir ces couvenances devant-dites, ne porchacier par mundamme justice ne par la crestientei par quoi \30 elles soient jamais rapellees ains les doiens fermement tenir à tous jors, par nostre sairement. 29 Et por ce que ce soit ferme chose et estable à tos jors avons nos seelees ces lettres de nos sees; 30 et li hono\31rable peire Rogiers, par la grace de Deu, evesques de Toul et Jehans, par la grace de Deu esleus de Verdun ont autresi mis lor sees par nostre requeste, en tesmoignage de veritei, en ces lettres \32 31 que furent faites quant li milliaires corroit par mil dous cens cinquante et un an, en mois de septembre.

Notes de transcription
^[1] ilexponctué.
^[2] ssuscrit.