Téléchargement du document

Documents linguistiques galloromans
Corpus : chartes de la Moselle (chMo)
Responsable du corpus : -
Édition de la charte : -

chMo007

1220, mars

Objet: Assise fixant les droits des chanoines du chapitre cathédral de Metz dans une quarantaine de villages du pays messin appartenant au ban Saint-Paul.

Support: Parchemin scellé sur double queue d'un sceau de cire verte; 395x390; repli: 25

Lieu de conservation: Archives départementales de la Moselle G 579 n° 1.

Édition antérieure: Pitz 2001, p. 336-342.

Commentaire: Pitz 2001, p. 387.

1 Ce sachent tuit cil qui cest escrit verrunt· 2 ke al tens· Erfon, le princier,· et Thirri,· le doïen,· per lor concorde et de tot le chapitle de Mez· 3 fut faite ceste assise en tote la terre \2 Saint Pol· en tel maniere:· 4 li bués et li vache et li chevals traianz,· chascuns de cez paera demee quarte de froment· et demee quarte d'avoine· et ·XII· d.· de tel monoie cum il cort là où il maint;· 5 et \3 li home et la fame qui n'aurunt beste traiant,· altretant com une beste traianz.· 6 Li sires ou la dame de l'ostel· paera ·III· gelines· chascuns asnes annals,· VI· d.· chascuns pors annals,· et chescune berbiz an\4nals ·I· d.· 7 Et si de ces bestes iert questions· k'ales ne fussent annals· al dit del maior et de l'eschevig s'en tenroit hom;· 8 en ceste prise penra li princiers son tierz· et li segnor les dous parz.· 9 Et ceste assise \5 doit estre faite per tote la terre Saint Pol· là où li signor la porrunt faire;· et tote la costenge en quel maniere cum la face· paera li tierz et les dous parz de l'assise,· soit en achat,· soit en servise,· soit en porchaz.· 10 Et \6 la volentez les segnors est· que ceste assise soit faite sor toz ceus qui sunt manant en bans Saint Pol,· qui ne sunt de masnie.· 11 En toz les leus où il a voei,· li princiers i penra ses servises· de blef et de deniers \7 cum il doit· et à soicrut assi,· ja soit ce qu'il n'i ait point de voei;· 12 et an altres leus où li princiers avoit servises de blef et de deniers et d'oulies· sunt cil servise mis avec l'assise.· 13 Li princiers ne penra niant en amendises, \8 ainz aurunt li segnor la moitié· et li prevost l'autre;· 14 et cele moitiez que li segnor aurunt· iert mise avec l'assise coment cum l'en liest et cum-qu'elle vaille.· 15 Et li princiers n'aura point de legnaz en tote la terre Saint Pol,· fors \9 le bois de Chainei ^[1],· s'il le vuet charrier à ses costenges por son ardoir.· 16 Et li princiers aura des mondillons enbanniz,· la droiture et le plait et la justise,· et li prevost penrunt altretant cum lor droiture montera \10 en sa part de l'assise.· 17 Et al jor que li mondellon doverunt lor cens paier,· li princiers envoera, s'il vuet, ses messages as corz où il apendent,· por savoir qui aura paié et qui non,· por ce que li maior n'en porrunt dés i en avant nul effai\11rement penre si per lo princier non.· 18 Et si est attornei que si li hom Saint Pol prent fame d'altre segnorage que de Saint Pol,· tote sa terre et tuit sui bien serunt à segnors,· 19 ensi que li heritages iert à l'aglise,· et li remananz, \12 soit moules, soit rançons, ira à l'assise.· 20 Arés ce n'aura li princiers nule giste en la terre Saint Pol,· ne il ne sa masnie,· et s'il i gist il vivera del sien assi cum il feroit en une estrange vile.· 21 Et si ^[2] per aventure avenoit qu'il i gust \13 per aucune necessitei· à l'esgart ^[3] des dous qui sunt attornei por les noveals cas à determiner s'en contenroit.· 22 Si li prevost ou li trescensier l'i moinent por lor affaire,· il despendera del lor.· 23 Si li chapitles l'i envoie,· il vivera \14 del tierz et des dous parz.· 24 Li princiers ne porra destraindre ne force faire n'à maior, n'à menestrel, ne altre home Saint Pol,· à nule creance faire,· ne metre en plegerie.· 25 Li tierz de la taille del vin de Millerei ^[4]· et \15 Loreis ^[5] et li dismes d'Arkencei ^[6]· et ses sals de Vi ^[7]· sunt le princier quitte.· 26 Li segnor envoerunt chascun an,· avec chascun prevost· et chascun trecensier del leu,· un chanoine por lever ceste assise;· 27 et doit estre levee \16 et charriee per ceus qui la doient ·VIII· jors devant feste saint Remei,· ou ·VIII· jors aprés,· 28 et si la liverrunt le celerier en clostre,· et cil liverra le princier le tierz· et les segnors les dous parz,· 29 n'en ançois ne en altre \17 leu n'en penra point li princiers,· ne altres por lui.· 30 Les deniers et les gelines recevrunt li prevost et li trescensier del leu,· et cil qui aurunt le blef recolli avec ous,· dedenz les ·XX· jors,· et donrunt le princier le tier· et les \18 segnors les dous parz.· 31 Cil qui ne paerunt lor assises dedenz ces termines,· la doverunt le demain des termines doble.· 32 S'om prent son gage et il l'escoult ·V· sous· d'amendise· et tuit cil ·V· sous· irunt à l'assise,· et tovoie la dovera \19 doble.· 33 S'il fait lait à prevost,· ne nul des segnors ne nul de lor comandemenz· il iert en la merci des segnors.· 34 Li princiers ne porra sa partie de l'assise ne vendre, ne engagier, ne fier, ne eschangier, si per le chapitle non.· 35 \20 Li segnor unt eslu dous chanoines qui doient determiner toz les cas qui avenrunt en ceste assise,· qui ne sunt determinei en cest escrit,· dunt il serunt requis.· 36 Si cum de la negligence del prevost· et del trescensier,· ou del chanoine \21 qui avec lui iert envoiez,· si per ouls remanoit l'assise à lever;· 37 et de ceus qui ferunt lait as segnors ou à lor comandemenz,· à lor gage escoute,· si li chapitles ne s'en acorde.· 38 Et de ceus qui penrunt fame d'altre signerage que de de Saint Pol, \22 tant cum à moble penre ou à la raçon,· et d'altres s'il i affierent.· 39 Si li princiers oltre ce qui ci est devisei,· nen il nen altres de part lui,· prent niant en la terre Saint Pol,· ne en ceus ne en celes où hom fait l'assise,· et hom le mostre \23 ceus dous,· il irunt al princier si li mosterrunt.· 40 Si li princiers le deffait,· pais est.· 41 Si nou conoist et li forfaiz valt ·V· s.· ou moins,· hom en croira celui ou ceus qui se plaindrunt· sor lor sermenz,· senz altre tesmognage.· 42 \24 S'il monte à plus, cil dui l'enquerrunt en bone foi,· et quant il l'averunt enquis,· s'il truevent que ce soit manz,· il le comperra à l'esgart des dous;· 43 et s'il truevent la clamor droite,· il la mosterrunt le princier,//· si le deffait c'est assez;· 44 \25 si nou deffait,· il le somenrunt que dedanz la quinzaine l'ait deffait,· et al jor de la somonce donrunt lo princier la some de la vallance del forfait à lor esgart escrite et seelee de lor seels,· si les unt,· 45 si nes unt, si les facent faire· \26 quant il serunt eslu,· et de là en avant, s'il nou deffait dedanz la quinzaine,· il iert eschuz en tel poine· qu'il perdera tote sa partie de l'assise de cele annee,· 46 et de l'altre annee s'il attent le deffaire jusque à l'altre an,· et ensi de tous les \27 altres,· et si iert excominiez à son los per l'auctoritei del chapitle.· 47 Et si nos jurra cest article· qui d'allors ne penra absolution;· et si la prent ne li varra niant al chapitle.· 48 Et de tot ce aura li chapitles de chascun princier \28 ses lettres overtes.· 49 De ceste poine ne li porrunt li segnor nule chose acquiter, ne relaissier, ne recompenser.· 50 Si li princiers vuet deffaire dedanz la quinzaine,· c'est assez;· 51 si le vuet deffaire aprés· les ·V· s.//,/· ou le moins rend \29 les dous,· ou l'un,· ou l'embdomedaire si ne ait nul d'eus.· 52 S'il i a plus les dous ou l'un,· s'il i sunt devant le Chapitle cottidiain,· per le Tesmognage de l'escrit cum li aura donei· et quant il aura rendu,· li dui ou li \30 uns,· ou li embdomedaires,· l'assolrunt en bone foi,· senz eslogne et senz eschu;· 53 en tel maniere cum cil dui enquerrunt et determinerunt des forfaiz le princier et des siens,· 54 enquerrunt il des preouz et des trescensiers \31 s'il prenoient niant en lor prevostez,· ne en lor trescens oltre les droites rentes et la moitié des amendises, ensi cum il est devisei;· 55 en tel maniere cum il iroient vers le princier,· et en tel poine cum li princiers escharroit s'il \32 nel deffaisoit dedanz la quinzaine,· encharroit li prevoz ou li trescensiers,· et avec l'excominiement.· 56 En leu de ce que li princiers pert sa partie de l'assise,· perdrunt il le frut de lor provende en cel an,· et des altres si li forfaiz \33 l'i consieut.· 57 Cil dui cu li chapitles a eslus,· eslirunt al chief de l'an dous altres· cum qu'il volrunt en bone foi,· fors ceus qu'ils i aurunt nomeiz.· 58 Et dedanz ·X· ans nel fera nus chanoines c'une fois,· et cil cu hom \34 eslira nel porra refuser cel an· qu'il ne perde le frut de sa provende cel an,· ou il jurra qu'il a si loial essoine· k'entremetre ne s'en puet.· 59 Et si li uns des esliz muert dedanz s'annee,· ses compaig eslira un altre;· 60 et si \35 li uns ou li dui vunt à l'escole,· ou en pelerinage,· ou en altre essoine droite,· per que il ne pussent lor annee perfaire,· il eslirunt dous altres en leu d'eus;· 61 et si cest dui ou li uns d'eus vient en la terre por ces besoignes, \36 il viverunt del tierz et des dous parz de l'assise,· 62 et li prevoz ou li trescensiers, quant il irunt lever l'assise,· il et li chanoine qui avec ouls serunt envoié· viverunt del tierz et des dous parz de l'assise,· et quant li prevoz ira altre \37 foiz,· il vivera del suen.· 63 Totes ces choses sunt attornees por la pais des segnors et del princier,· et por la seurtei et por l'aise et por le prou et la pais des homes Saint Pol qui pairunt ceste assise.· 64 Et por totes ces choses \38 est le princiers plus tenuz à deffendre la terre et porchacier le prou et les biens de la terre Saint Pol.· 65 Cist escriz fu faiz l'an de l'incarnation Nostre Segnor· c'om dist ·M· et CC· et XX,· el mois de marz, \39 al tens Conrart l'aveske de Mez· et chancelier de l'Empire.·

Notes de transcription
^[1] Chesny , Moselle , canton de Verny .
^[2] Si inséré par le scribe .
^[3] Ms . l - es gart .
^[4] Millery , Meurthe - et - Moselle , canton de Pont - à - Mousson .
^[5] Lorry - lès - Metz , Moselle , canton de Woippy .
^[6] Argancy , Moselle , canton de Vigy .
^[7] Vic - sur - Seille , Moselle , chef - lieu de canton .