Téléchargement du document

Documents linguistiques galloromans
Corpus : docJuBe (chJuBe)
Responsable du corpus : -
Édition de la charte : -

docJuBe187

1342, 9 novembre.

Type de document: charte: vente en franc-alleu

Objet: Vente en franc-alleu par Ythenet, veuve d’Huguenin, de Charmoille, autorisée par Richart[le Donzel], de Charmoille, écuyer, son avoué, par Nicolas, prêtre, moine en l’abbaye deLucelle, et par Thomas, prêtre, ses fils, à Loviat, de Courgenay, fils de feu Huguenetle maire, de Courgenay, et mari de Perreton, sœur de la venderesse, pour 100 l. de vieuxbâlois ayant cours au marché de Porrentruy de pièces de terre à Courgenay et àCourtemblin. — Acte passé sous les sceaux de Pierre dit Cordelier, curé de Courgenay, deLouis, curé d’Alle, et d’Henri, curé de Charmoille.

Commentaire: Parchemin jadis scellé de trois sceaux sur double queue. AAEB, Chartes. — Analyse parJ. Trouillat, Monuments…, III, p. 804.

1 Nos, Ythenaz, fome çai en arriers Huguenim, de Charmoilles, qui fuyt, Nycholay, prestres, moinnes en l-abaie de Lucelans, et Thomax, frere dou dit Nycholay, \2 prestre, anfanz de lai dite Ythenet et de Huguenim dessus dit, qui fuyt, 2 faiçons savoir a-touz ces qui verront et horront ces presentes lettres 3 que nos, ne decehuz, baretez, \3 controinz ne menez per force d-aucuns, maix saiges et bien avisez, et pour le bon profit evidant de nos et de nos hoirs, et per le loy et bone voluntey de Rechart \4 de Charmoilles, escuiers, vouhez de moi, Ythenet dessus dite, mere des dessus dit Nycholay, prestre, et Thomay, freres, deney a moi per une uverte justise \5 sesanz en justise uverte pour ce caux et pour plusours autres, que nos havons venduz et vendons, pour nos et pour nos hoirs, pour touz jours-maix, a muyx que on \6 puet faire vendicion et pluis fermement entandre, pour franc aluef, ai Loviet, de Courgannai, filz Huguenet le maire, de Courgannai, qui \7 fuyt, li quelx Loviaz, mari de Parreton, nostre suer, pour luy et pour ses hoirs, pour touz jours-maix, les choses cy aprés escriptes, gesanz \8 ou finaige et terretoire de Courgannai, c-est a-savoir: 4 le champ dou luec que on dit a Buet, li hoirs Vernier le Lorent, de Courtamblain, ont \9 d-une part et li moinnes de Lucelans ont d-autre part; 5 item, le prey dou Buet a chavon dou champ dessus dit, li hoirs Huguenet le maire dessus \10 dit ont d-une part; 6 item, tout le remenent entierement, sanz riens excepter, que nos haviens, pouhiens ne deviens havoir de part pere \11 et de part mere en tout le finaige et terretoire, outre les quattres cours, fuyt en champs, en preyz, en bois, en maisons, en chesaulx, en curtilz, en \12 uches, en essers ou en quelque autre meniere que ce fuyt ne puet estre; 7 item, les plaices de preyz cy aprés devisees, gesanz ou luec \13 que on dit en lai Montaigne, en lai fin et terretoire de Courtamblaim, es lues cy aprés devis, c-est a-savoir; 8 a-Salin, une plaice, li mo\14innes de Lucelans ont d-une part et li hoirs Courtat, de Courtamblain, ont d-autre part; 9 item, en lai Versainne, lai moitie d-une plaice, li mo\15innes de Lucelans ont d-une part et Perrins diz dou Bois d-autre part; 10 item en Prey Rondat, lai moitie de lai plaice, li hoirs Valtherel, de Saint \16 Gelin, hont d-une part et li hoirs Garnier le Lorent, de Courtamblain, hont les autres moities des dites doues plaices de lai Versainne \17 et de Prey Rondat, pour cent libres de viez bailloys, menoie coursauble en ce temps ou merchief de Pourreintruy. 11 Les quelles cent libres de lai menoie \18 dessus dite nos, li dessus nommez Ythenaz, Nycholax, prestres, et Thomaix, freres, anfanz de lai dite Ythenet, havons hahues et recehues dou dit Loviet, mari \19 de Parreton, nostre suer, dessus dit, en bone menoie bien et lealment nombree et de son propre chatel, et les havons mises et con verties en nostre evidant profit \20 et de nos hoirs, si que nos nos en sumes tenuz et tenons pour bien pahiez entierement dou dit Loviet et de ses hoirs, pour nos et pour nostres hoirs. 12 \21 Et est a-savoir que lai dite terre de lai fin et terretoire de Courgannai doit seix soulz et quattre deniers d-andiversaire de annuhel rante, ai \22 touz jours-maix, es lues ci aprés devis, que li diz Loviaz et suy hoirs doivent pahier chascun anz a-touz jours-maix, c-est a-savoir: a-l-esglise de \23 Courgannai cinc soulz et quettre deniers, et a-priorrai de Lanthenans douze deniers; dou quel champ dit dou Buet dessus dit et dou quel prey et \24 de tot le remenant, enssi come il est dessus dit, per les seix solz et quettre deniers de annuhel rante ordenee es lues dessus dit que li diz Loviaz et suy hoirs \25 doivent pahier es diz lues a-touz jours-maix, per-cete forme et meniere nos nos en sumes devestus et devestons, pour nos et pour nos hoirs, pour touz jours-maix, \26 et li dit Loviet, luy et ses hoirs, en havons envestu et envestons pour touz jours-maix, et se les en havons mis et mettons en bone tenure et leaul \27 et en bone et corporel possession pour touz jours-maix per la tradicion de ces presentes lettres. 13 Et si havons promis et promettons, per nos foiz pour ce corporelment \28 donees en luec de seirement et aprés sus l-obligacion de touz nos biens moubles et neanz moubles, presenz et a-venir, quel part que il soient, en \29 franchise ou deffors, que nos contre ces dites convenances ne contre cete dite vendicion n-irons ne ne ferons ai aler per nos ne per autruy, coihement ne \30 an apert, maix les tanrons, apaiserons, garantirons et deffendrons, en touz lues, en totes cours, en touz jugemenz et deffours, encontre ^[1] totes genz \31 et per devant touz juges, tant ecclesiastres quant seculers, per tant de temps come a-leaul tenure s-afier en Ajoye, ai nos propres despans et missi\32ons, non obstant acunne exception de fait ou de droit, a-dit Loviet et a-ses hoirs, per nos et per les nostres hoirs. 14 En tesmoignaige de lai \33 quel chose, nos, li dessus nommez Ythenaz, messi Nycholay, prestres, Thomaix, frere dou dit monssi Nycholax, et Rechars, escuiers dessus diz, vouhez de \34 lai dite Ythenet, havons proier et requis a-discretes persones et saiges, ai monssi Pierre, curez de Courgannai, ai monssi Louy, cureyl d-Alle, et \35 a-monssi Henry, curel de Charmoilles, que il mettent lour seelz en ces lettres; et nos, li dessus nommez Pierres diz Courdeliers, curez en ce \36 temps de Courgannai, Louy, en ce temps curez d-Alle, Henry, en ce temps curez de Charmoilles, es proieres et as requestes des persones dessus nom \37mees, havons mis nos seelz pendanz en signe de veritey. 15 Faictes et donees le sambbadi devant lai Saint Mertin d-yvert, ou moys \38 de novembre, l-an Nostre Seignour courrant per mil trois cent quarante et dous.

Notes de transcription
^[1] Ainsi coupé: en contre.