Téléchargement du document

Documents linguistiques galloromans
Corpus : (chAub)
Responsable du corpus : -
Édition de la charte : -

chAub003

1241 (n. st.), 1-30 mars.

Type de document: Charte: engagement.

Objet: Engagement pris par Renaut, fils de Jean de Champgilart et d'Ermenjart, sa femme, de respecter les termes du contrat de vente d'une rente de 40 sous de provenisiens, conclu par ces derniers en faveur de Barthélémy, chanoine de Notre-Dame-aux-Nonnains de Troyes, le 26 avril 1239 (acte n^o 2, vidimé ici). Les deux époux et leur fils s'engagent à faire payer annuellement la rente à l'acheteur par les drapiers d'Ypres au titre du loyer qu'ils sont tenus de payer pour la maison de la Corderie. Possibilité de rachat de la rente moyennant une somme de 50 livres de provenisiens forts payable à la prochaine foire Saint-Jean.

Auteur: Pierre de Bordes, maire de Troyes.

Disposant: Renaut, fils de Jean de Champgilart et d'Ermenjart, sa femme.

Sceau: Pierre de Bordes, maire de Troyes.

Bénéficiaire: Barthélémy, chanoine de Notre-Dame-aux-Nonnains de Troyes.

Autres Acteurs: Jean de Champgilart et Ermenjart, sa femme.

Support: Parchemin scellé sur double queue d'un sceau de cire rond jaune dont il ne subsiste qu'un fragment (A. Roserot, 1884, Origines municipales de Troyes, pl. II et p. 12-13).

Lieu de conservation: Archives départementales de l'Aube, 22 H 1828 (fonds de l'abbaye Notre-Dame-aux-Nonnains).

Édition antérieure: Ch. Lalore, 1874, Documents sur l'abbaye Notre-Dame-aux-Nonnains, p. 103, n^o 160, édition partielle; A. Roserot, 1884, Origines municipales de Troyes, p. 13-15; D. Coq, 1988, Documents linguistiques de la France. III. Aube, Seine-et-Marne, Yonne, p. 6-11.

Verso: Littera Petri majoris Trecensis de censu vendito domino Bartholomeo (XIII^e s.).

1 Gié, Pierres de Bordes, maires de la commune de Troies, 2 faz savoir à toz cels qui ces presantes letres verront 3 que, en ma presance establi, Jehanz de Champgilart et Hermenjarz, \2 sa fame, reconurent par devant moi que il ont vendu et vendirent en l'an .M.CC. et .XXXIX., ou mois d'avril, le mardi en l'andemain de feste saint Marc Euvangelistre, 4 à mon \3 seignor Bertholomiau, chanoine de Nostre Dame Sainte Marie de Troies, à toz jors à-tenir, 5 les choses desoz nommees et expresses et devisees aus letres Bernart de Mont Cuc, mon devantier, \4 faites de cele vendue, les quels letres je ai veues et oïes mot à mot, seelees dou seel à cel Bernart, dont la tenor est tele:
6 Gié, Bernarz de Mont Cuc, maires de la commune de Troies, \5 7 faz savoir à-toz cels qui ces presantes letres verront 8 que en ma presance furent establi Jehanz de Champgilart et Hermenjarz, sa fame, et reconurent par devant moi que il ont vendu 9 à \6 mon seignor Bertremiau, chanoine de Nostre Dame Sainte Marie de Troies, à toz jors à-tenir 10 .XL. s. de provenisiens à-prandre chascun an en la foire Saint Jehan sor lai maison qui siet en l'entree de la \7 Corderie à Troies, en la quele maison li drapier d'Ypre vendent aus foires de Troies, delez la maison feu Claret, en tel maniere que quicunques tenra cele maison sera tenuz à paier chascun an \8 à cel Bertremiau ou à son commandement en la foire Saint Jehan dedenz droit paement .XL. s.; 11 et ceste vendue fu faite par l'acort et l'assentement de Pierre Contesse, citoien et \9 borjois de Troies qui est sires censiers de cele maison; 12 et cil Bertromiaus ne porra riens demander ne reclamer aus lous et aus ventes de cele maison, se avenoit qu'ele fust ven\10due. 13 Et si ont vendu cil Jehanz et sa fame sanz force et sanz contreignement à cel devant-dit Bertromiau .XX. s. et X. d. et obole de cens à-parcevoir et à-tenir à-toz jors chascun an, et les los \11 et les ventes, se avenoit que les teneures por quoi on doit ce cens fussent vendues; et ces .XX. s. et .X. d. et obole de cens li ont il vendu avec les .XL. s. devant diz por .XL. lb. .XV. s. de boens pro\12venisiens forz et leauls, des quels il se tiennent por bien paié. 14 Et ce sunt cil qui doivent le cens, si cum il dient et si cum cil Jehanz et sa fame ont reconeu par devant moi et m'ont fait \13 entendant: li anfant faü Jehan Saymet .II. s.; Haymeris li Tisseranz .XXXII. d. por ses maisons devant Saint Remi, à rendre chascun an à la-feste saint Remi; Brices li Barbiers .XI. d. por \14 la place Aveline la-Rouse; la fame feu Garnier de Mez Robert .VI. d. por sa chambre de la Maceclerie; li amfant feu Godefroi le Petit .VI. s. de lor porpris; Jehanz li Ferpiers .XII. d. \15 por la place Thierri Cornet; la fame feu Angerbert Oreillart .XII. d.; Felis li Cocons .VI. d. d'une part et .IX. d. d'autre part por la maison faü Climent; Garins li Noirs .VI. d. \16 por la-terre Moron; Guillaumes Restoz .XII. d. por son vergier aus Molins Osmont; Duins .XII. d. à la Saint Jehan à rendre por son porpris de Torvoie; la fame feu Gilart .III. d. por son \17 vergier; Symons de Champgilart .XXXIII. d. et obole. 15 Et si-ont fiancié cil Jehanz et sa fame que de ces vendues il porterunt à cel Bertremiau garantie à toz jors envers totes \18 genz et que par auls ne par autrui il ne procureront que ces vendues soient rapelees, et que ces choses que il ont vendu ne sunt enliees à nul autre home ne fame par gaige\19rie ne par autre maniere; et en ce ont il mis peinne de .X. lb., en-tel maniere que, se ces vendues estoient rapelees par aucun en aucune maniere et cil Bertremiaus en avoit ou \20 encorroit aucuns domaiges ou deperz, cil Jehanz et sa fame, par lor foiz fianciees en ma main, ou lor oir seroient tenu à rendre à cel Bertremiau sanz difficulté et sanz contredit \21 ces devant dites .X. lb. et les deperz. 16 Et de ces covenances à-tenir ont mis en response cil Jehanz et sa fame à cel devant dit Bertremiau ^[1] la maison sor quoi il li ont assignez les \22 .XL. s. devant diz. 17 En tesmoingnance de ceste chose je ai mis à ces presantes letres mon seel. 18 Ce fu fait en l'an de grace .M.CC. et .XXXIX., ou mois d'avril, le mardi en l'an\23demain de feste saint Marc Euvangelistre.
19 \24 Et est à-savoir que ces devant-dites vendues et totes les covenances qui sunt contenues aus devant dites letres, si cum eles sunt \25 desus expresses et devisees, loa et creanta par devant moi et promist à tenir et à garder de sa bone volanté, sanz force et sanz contreignement, et de son boen gré Renauz, li \26 filz de cel Jehan et de cele Hermenjart, qui estoit fors de lor avoerie, si cum cil Jehanz et cele Hermenjarz et cil meisme Renauz reconurent par devant moi; 20 et à ces vendues \27 et à totes ces covenances à-tenir et à garder fermement en la maniere qu'eles sunt desus expresses et devisees et an autel maniere cum cil Jehanz et Hermenjarz les ont promises à-tenir et à \28 garder, se oblija icil Renauz par devant moi par sa foi fianciee en ma main corporelment; 21 et avec ce, ont fiancié en ma main cil Jehanz et Hermenjarz et Renauz que il feront creanter \29 en la foire Saint Jehan qui vient proichienne aus marcheanz d'Ypre ou à autres qui en cele foire tenront la devant dite maison et la volte qui est darriers la maison, sor les queles choses li \30 devant dit .XL. s. sunt assis, par devant moi que, tant cum il les tenront, il rendront chascun an à cel Bertremiau ou à son commandement au droit paement de la foire Saint Jehan .XL. s. de provenisiens dou loier \31 de cele maison et de la volte; 22 et ont otroié par devant moi cil Jehanz et Hermenjarz et Renauz que, se li marcheant qui tenront cele maison et la volte, quel qu'il soient, ne rendoient chascun an les \32 .XL. s. à cel Bertremiau ou à-son commandement au droit paement de la foire, cil Bertromiaus i-puisse gaigier sanz meffaire et sanz justice; 23 et se avenoit en aucune maniere que cil .XL. s. ne fussent \33 paié en aucune des foires ou que la maisons par aucune aventure fust destruite, dont Dex la gart, cil qui tenroit la-maison et la volte ou la place rendroit chascun an les .XL. s. à cel \34 Bertremiau ou à son commandement. 24 Et totes ces covenances devant dites et escrites ont fiancié ^[2] par devant moi cil Jehanz et Hermenjarz et Renauz tenir et garder en bone foi, et que il ne \35 venront encontre, par aus ne par autrui, en aucune maniere, et que cele maison et la volte il n'ont donee ne vendue ne engaigiee à home ne à fame en maniere que il n'en puissent bien faire \36 les choses devant dites; 25 et est à-savoir que mes sire Bertromiaus lor a otroié par devant que il puissent les choses devant dites rachater et ravoir, se il vuelent, por .L. lb. de provenisiens boens et forz \37 paiees à lui ou à son commandement dedenz le droit paiement de la proichienne foire Saint Jehan avec les .XL. s. qu'il doit avoir en cele foire dou loier de la devant dite maison et de la volte por sa rente de \38 ceste annee, en tel maniere que nule paie de ces deniers ne nule quitance de ces choses il ne porrient prover en aucuns tens fors que par letres seelees des seels l'official et le maieur de Troies. 26 Et por \39 totes ces choses tesmoignier, je ai ces presantes letres seelees de mon seel. 27 Ce fu fait en l'an de grace .M.CC. et quarante, ou mois de marz.

Notes de transcription
^[1] Le scribe avait écrit àcelB. d. d. et a rétabli l'ordre par des signes de renvoi.
^[2] Les mots ontfianciésont répétés deux fois par erreur.